اعظم گڑھ: اکھلیش کی ایک جھلک دیکھنے کے لئے  بھیڑ  ٹوٹ پڑی، پولیس کو لاٹھی چارج کرنا پڑا

لکھنؤ:اب لوک سبھا چناؤ کے صرف دو مرحلے باقی ہیں -یوپی کا پوروانچل میدان جنگ بنا  ہوا ہے -کہا جارہا ہے کہ یہاں بی جے پی کا وہ ووٹر رہتا ہے جس کو لابھارتی طبقہ کہتے ہیں  مگر جو حالات سامنے آرہے ہیں ان سے لگتا ہے کہ بی جے پی کو سخت مقابلہ کا سامنا ہے جس طرح بھیڑ اپنے لیڈروں کو دیکھنے کے لئے بے قابو ہورہی ہیے اس سے کچھ اشارے ملتے ہیں -پھول پور اور سنت کبیر نگر کے بعد اب اعظم گڑھ میں بھی انڈیا الائنس کے جلسے میں لوگوں کی بھیڑ بے قابو ہو گئی۔ لوگ اپنے چہیتے لیڈر کی ایک جھلک دیکھنے کے لیے ایک دوسرے پر کچھ اس طرح ٹوٹ پڑے کہ انہیں سنبھالنے کے لیے پولیس کو لاٹھیاں چلانی پڑیں۔ مگر لوگوں کی دیوانگی کو پولیس کی لاٹھیاں بھی نہیں روک سکیں اور لوگ ایک دوسرے پر گرتے ہوئے نظر آئے۔
خبروں کے مطابق اتر پردیش میں ایس پی سربراہ اکھلیش یادو کی ریلیوں میں حامیوں کی بڑی تعداد جمع ہو رہی ہے۔ اکھلیش یادو ریاست بھر میں جس جگہ بھی جلسۂ عام سے خطاب کرنے جا رہے ہیں لوگ بڑی تعداد میں ان کو سننے اور انہیں دیکھنے کے لیے آ رہے ہیں۔ اکھلیش یادو کے تئیں عوام میں ایک طرح کی دیوانگی محسوس کی جا رہی ہے جو ان کی ایک جھلک دیکھنے کے لیے بے قابو سی ہو جا رہی ہے۔ اسی ہی دیوانگی کا مظاہرہ گزشتہ دتوں پھول پور میں بھی ہوا تھا جس میں اکھلیش یادو کے ساتھ کانگریس کے لیڈر راہل گاندھی بھی موجود تھے۔
پھول پور کی ریلی میں جمع ہوئی بھیڑ اکھلیش یادو اور راہل گاندھی کو دیکھنے کے لیے رکاوٹ توڑ کر اسٹیج کے قریب پہنچ گئی تھی، جس کے بعد سیکوریٹی کے نقطۂ نظر سے دونوں لیڈروں کو بغیر خطاب کیے واپس لوٹنا پڑا تھا۔ اس کے بعد ان دونوں لیڈروں کو ریلی کے مقام سے ہی ویڈیو جاری کرنی پڑی۔ اب اعظم گڑھ میں بھی لوگوں کی جانب سے ایسی ہی دیوانگی کا مظاہرہ کیا گیا ہے۔ اکھلیش یادو کی ایک جھلک اور ان کے قریب جانے کی کوشش میں لوگ ایک دوسرے پر گرنے لگے جس کے بعد صورت حال بگڑ گئی۔ بالآخر لوگوں کو قابو میں کرنے کے لیے پولیس کو لاٹھی چارج کرنی پڑی۔