اکھلیش نے اشاروں اشاروں میں اسپیکر کو آئینہ دکھایا،پرانے فیصلے یاد دلائے

سماجوادی پارٹی کے سربراہ اور قنوج سے رکن پارلیمنٹ اکھلیش یادو نے بڑے مضبوط انداز اور سلجھے ہوئے لہجہ میں  اوم برلا کو لوک سبھا اسپیکر منتخب ہونے پر مبارکباد دی۔ اور اشاروں اشاروں میں بہت کچھ کہہ گئے -انہوں نے اپنے پہلے تخاطب میں برلا کے پرانے فیصلے یاد کئے اور امید ظاہر کی کہ ناخوشگوار اقدامات کو دوہرایا نہیں جائے گا-انہوں نے اوم برلا کو دوبارہ اسپیکر منتخب ہونے پر مبارکباد دیتے ہوئے کہا کہ آپ جس عہدے پر فائز ہیں اس سے کئی شاندار روایتیں وابستہ ہیں۔ مجھے امید ہے کہ یہ بلا کسی امتیاز کے آگے بڑھے گا۔
اکھلیش یادو نے کہا کہ آپ کا ہمیشہ اپوزیشن پر کنٹرول ہوتا ہے لیکن ہم امید کرتے ہیں کہ حکمراں پارٹی کے ممبران پارلیمنٹ پر بھی آپ  کا کنٹرول رہے گا۔ انہوں نے کہا کہ آپ چیف جسٹس کی طرح بیٹھے ہیں، مجھے امید ہے کہ کسی کی آواز نہیں دبائی جائے گی اور کسی کو معطل کرنے جیسا  کوئی اقدام نہیں کیا جائے گا۔ اکھلیش یادو نے کہا کہ آپ کے اشارے پر ایوان چلنا چاہئے اور اس کے برعکس نہیں ہونا چاہئے۔ ہم آپ کے ہر جائز فیصلے کے ساتھ کھڑے ہیں۔ میں آپ کو صدر کا عہدہ سنبھالنے پر مبارکباد دیتا ہوں۔
سماجوادی پارٹی کے سربراہ نے کہا کہ میں پہلی بار اس نئے ایوان میں آیا ہوں، میں نے سوچا کہ آپ کی کرسی بہت اونچی ہوگی۔ کیونکہ میں جس ایوان کو چھوڑ کر آیا ہوں وہاں کرسی بہت اونچی ہے۔ انہوں نے کہا کہ اس نئے ایوان میں پتھر تو ہیں لیکن دیوار میں کچھ سیمنٹ ابھی بھی لگا ہے۔ قنوج کے رکن پارلیمنٹ نے کہا کہ ہم آپ کے تمام منصفانہ فیصلوں کے ساتھ رہیں گے مگر یہ امید بھی کرتے ہیں کہ صرف اپوزیشن کو ہی کنٹرول میں رکھنے کی کوشش نہیں کی جائے گی۔ انہوں نے کہا کہ آپ کے پاس 5 سال کا تجربہ ہے۔ اب آپ دوبارہ سپیکر منتخب ہو گئے ہیں، میں اپنی اور اپنے ساتھیوں کی طرف سے آپ کو بہت بہت مبارکباد پیش کرتا ہوں۔