دہلی کے بعد گجرات میں گری ایرپورٹ کی چھت ،پی ایم نے کیا تھا افتتاح

راجکوٹ بین الاقوامی ہوائی اڈے پر ہفتہ کو ایک بڑا حادثہ ٹل گیا۔ یہاں بھی دہلی ایئرپورٹ کے ٹرمینل 1 جیسا حادثہ ٹل گیا۔ ہیراسر میں بین الاقوامی ہوائی اڈے پر ٹرمینل کے باہر مسافروں کے پک اپ ڈراپ ایریا کے اوپر کی چھت گر گئی۔ خوش قسمتی ہے کہ اس حادثے میں کوئی جانی نقصان نہیں ہوا۔ پی ایم مودی نے جولائی 2023 میں راجکوٹ ہوائی اڈے کی نئی ٹرمینل عمارت کا افتتاح کیا تھا۔ اس ہوائی اڈے کی توسیع 1400 کروڑ روپے سے زیادہ کی لاگت سے کی گئی۔
اس سے ایک دن پہلے دہلی ہوائی اڈے کے ٹرمینل 1 پر ایک ایسے ہی واقعے میں ایک شخص اپنی جان سے ہاتھ دھو بیٹھا تھا اور کچھ دیگر زخمی ہوئے تھے۔ محکمہ موسمیات کے مطابق جنوبی گجرات میں ایک سائیکلون سسٹم سرگرم ہے جس کی وجہ سے ریاست کے کچھ حصوں میں بڑے پیمانے پر بارش ہو رہی ہے۔ محکمہ موسمیات کا یہ بھی کہنا ہے کہ بارشوں کا یہ سلسلہ اگلے پانچ روز تک جاری رہے گا۔ آئی ایم ڈی نے جنوبی گجرات کے لیے ‘یلو الرٹ’ جاری کیا ہے۔
جبل پور میں ڈومنا ہوائی اڈے کے نئے توسیع شدہ ٹرمینل کی چھت کا ایک حصہ بھی جمعرات کو شدید بارش کی وجہ سے ٹوٹ گیا۔ اس واقعے میں شامیانے کے نیچے کھڑی سرکاری اہلکار کی گاڑی کو نقصان پہنچا۔ وزیر اعظم نریندر مودی نے صرف تین ماہ قبل اس ہوائی اڈے کا افتتاح کیا تھا۔ جبل پور ہوائی اڈے کی انتظامیہ نے کہا کہ یہ حادثہ شامیانے پر بارش کا پانی جمع ہونے کی وجہ سے پیش آیا۔ ائیرپورٹ اتھارٹی آف انڈیا نے ایک بیان میں کہا، ‘واقعے کی تکنیکی وجوہات کی جانچ کی جا رہی ہے تاکہ اس بات کو یقینی بنایا جا سکے کہ ایسے واقعات دوبارہ نہ ہوں۔ اے اے آئی (جبل پور) نے اس واقعہ پر افسوس کا اظہار کیا اور جامع حل کی یقین دہانی کرائی۔