گوتم گمبھیرانڈین  کرکٹ ٹیم کے نئے ہیڈ کوچ نامزد

بی سی سی آئی کے سکریٹری جے شاہ نے منگل کو گوتم گمبھیر کو ہندوستانی مردوں کی کرکٹ ٹیم کا نیا ہیڈ کوچ بنانے کا اعلان کیا۔ سابق بھارتی اوپنر گوتم گمبھیر نے اس تقرری کے بعد اظہار تشکر کیا۔ گمبھیر راہل دراوڑ کی جگہ لیں گے۔ راہل کی قیادت میں، ہندوستان 2023 میں آئی سی سی ورلڈ ٹیسٹ چیمپئن شپ اور 50 اوور کے ورلڈ کپ کے فائنل میں پہنچا اور 2024 میں ٹی 20 ورلڈ کپ جیتا۔
جے شاہ نے اپنے ٹویٹر اکاؤنٹ پر لکھا، ‘میں بہت خوش ہوں کہ میں گوتم گمبھیر کو ہندوستانی کرکٹ ٹیم کے نئے ہیڈ کوچ کے طور پر خوش آمدید کہہ رہا ہوں۔ موجودہ دور میں کرکٹ نے تیزی سے ترقی کی ہے اور گوتم نے اس بدلتی ہوئی صورتحال کو قریب سے دیکھا ہے۔ اپنے پورے کیریئر میں مختلف کرداروں میں شاندار کارکردگی کا مظاہرہ کرنے کے بعد، مجھے یقین ہے کہ گوتم ہندوستانی کرکٹ کو آگے لے جانے کے لیے ایک مثالی شخص ہیں۔’
گمبھیر کی بطور ہیڈ کوچ پہلی ذمہ داری اس ماہ کے آخر میں سری لنکا کا دورہ ہوگی۔ اس میں تین ون ڈے اور تین ٹی ٹوئنٹی میچز شامل ہوں گے۔ بی سی سی آئی نے ابھی تک اس بات کی تصدیق نہیں کی ہے کہ آیا اسسٹنٹ کوچ وکرم راٹھور (بیٹنگ)، پارس مہمبرے (بولنگ) اور ٹی دلیپ (فیلڈنگ)، جنہوں نے دراوڑ کے ساتھ کام کیا تھا، اپنے کرداروں میں جاری رہیں گے۔