جمہوریت میں عوام ہی سپریم :بی جے پی کو آرایس ایس  کی تنبیہ

لوک سبھا انتخابات میں بی جے پی کی سیٹوں میں کمی کے بعد پارٹی میں اب بھی منتھن کا دور جاری ہے۔ اب بی جے پی کی کارکردگی پر آر ایس ایس کی جانب سے بھی ردعمل سامنے آیا ہے۔ جب آر ایس ایس کے آل انڈیا پبلسٹی چیف سنیل امبیکر سے بی جے پی کی کارکردگی کے بارے میں پوچھا گیا تو انہوں نے کہا کہ جمہوریت میں جنتاسب سے اوپر ہے اور سب کو عوام کے فیصلے کا احترام کرنا چاہیے۔
یہ بیان سنیل امبیکر نے رانچی میں تین روزہ ریاستی مہم کے اجلاس کے آخری دن دیا۔ انہوں نے کہا کہ جمہوریت میں عوام کی بالادستی ہے۔ یہی جمہوریت نظر آتی ہے۔ تمام سیاسی جماعتیں انتخابات کے دوران اپنے پیغامات عوام کے درمیان لے جاتی ہیں اور لوگ ان پیغامات کی بنیاد پر اپنے فیصلے کرتے ہیں۔ انہوں نے کہا کہ عوام نے اپنا فیصلہ سنا دیا ہے اور سب کو اس کا احترام کرنا چاہیے۔ سنیل امبیکر نے اس دوران کہا کہ آر ایس ایس کسی انتخابی کام میں حصہ نہیں لیتی بلکہ رائے عامہ کو تشکیل دینے کا کام کرتی ہے۔
آر ایس ایس کے نیٹ ورک کو بڑھانے کے لیے ذہن سازی جاری ہے!
آنے والے دنوں میں مہاراشٹر، ہریانہ اور جھارکھنڈ میں اسمبلی انتخابات ہونے والے ہیں۔ آر ایس ایس کی اس میٹنگ میں تنظیم کے نیٹ ورک کو وسعت دینے کی حکمت عملی پر تبادلہ خیال کیا گیا۔ ذرائع نے پہلے اشارہ کیا تھا کہ آر ایس ایس کے ارکان اسمبلی انتخابات میں بی جے پی کی زیادہ فعال مدد کرنے کا امکان میٹنگ میں بحث کے دوران سامنے آسکتا ہے۔ تاہم اس حوالے سے سوال کے جواب میں سنیل امبیکر نے کہا کہ یہ باتیں کھل کر نہیں بتائی جاتی ہیں۔