ہریانہ میں ہندوآبادی 2.54کروڑ،مسلمان محض17لاکھ،پھر بھی بی جے پی نے مسلم ریزرویشن کا خوف دکھایا

نئی دہلی:ہریانہ میں مسلمانوں کی آبادی صرف 7.2 فیصد ہے اور ریاست میں ہندوؤں کی کل آبادی 87.46 فیصد ہے۔ ریاست کی کل 2.54 کروڑ آبادی میں سے مسلمانوں کی آبادی 17 لاکھ 81 ہزار ہے۔ اگر ہم ہریانہ کے 21 اضلاع کی بات کریں تو میوات ضلع کو چھوڑ کر 20 اضلاع ہندو اکثریتی اضلاع ہیں۔ اس کے باوجود مرکزی وزیر داخلہ امت شاہ نے منگل کو مسلم ریزرویشن کا ذکر کرکے ہندو آبادی کو خوفزدہ کرنے کی کوشش کی۔ انہوں نے یہ بھی کہا کہ وہ ہریانہ میں مسلم ریزرویشن کو لاگو نہیں ہونے دیں گے۔ لیکن اگر کانگریس آئی تو کرناٹک کی طرح مسلم ریزرویشن نافذ کرے گی۔
امت شاہ نے منگل کو جنوبی ہریانہ کے مہندر گڑھ ضلع میں ‘پچھڑا ورگ سمن سمیلن’ میں کہا کہ کانگریس پسماندہ طبقے کی مخالف ہے۔ اگر کانگریس ہریانہ میں اقتدار میں آتی ہے تو وہ ان کا ریزرویشن چھین کر مسلمانوں کو دے گی۔ شاہ نے کہا- کانگریس نے او بی سی ریزرویشن کے لیے 1950 کی دہائی میں بنائے گئے کاکا کالیکر کمیشن کی سفارشات کو برسوں تک لاگو نہیں کیا۔
امت شاہ نے کہا- 1980 میں اس وقت کی وزیر اعظم اندرا گاندھی نے منڈل کمیشن کو پس پشت ڈال دیا۔ 1990 میں جب اسے قبول کیا گیا تو راجیو گاندھی نے ڈھائی گھنٹے کی تقریر کی اور او بی سی ریزرویشن کی مخالفت کی۔ مرکزی وزیر نے کہا ’’کرناٹک میں کانگریس نے پسماندہ طبقات کے لیے ریزرویشن چھین کر مسلمانوں کو دے دیا۔ اگر وہ یہاں (ہریانہ) آتے ہیں تو یہاں بھی ایسا ہی ہوگا۔
امت شاہ نے آندھرا پردیش کا ذکر نہیں کیا، جہاں ان کی اتحادی تیلگو دیشم پارٹی (ٹی ڈی پی) نے 2024 کے اسمبلی انتخابات میں مسلمانوں کے لیے 4.5 فیصد مسلم ریزرویشن کا وعدہ کیا ہے۔ بھاری اکثریت حاصل کرنے کے بعد چیف منسٹر چندرابابو نائیڈو نے کہا کہ مسلم ریزرویشن کا وعدہ پورا کیا جائے گا۔ آندھرا پردیش میں بی جے پی اور ٹی ڈی پی کا اتحاد ہے۔ لیکن بی جے پی یا مودی شاہ نے کبھی آندھرا میں مسلمانوں کو ریزرویشن دینے کی مخالفت نہیں کی۔ نہ الیکشن سے پہلے اور نہ الیکشن جیتنے کے بعد۔ لیکن مسلم ریزرویشن اور آندھرا سے باہر کے مسلمانوں پر پی ایم مودی اور امت شاہ کے بیانات کچھ اور ہیں۔