ڈی ڈی اے  مسجد فیضیاب  اور مدرسہ کے لیے متبادل زمین الاٹ کرے:دہلی ہائی کورٹ کا حکم

دہلی ہائی کورٹ نے دہلی ڈیولپمنٹ اتھارٹی (ڈی ڈی اے) کو حکم دیا ہے کہ وہ نظام الدین ایسٹ کے سرائے کالے خان میں واقع 40 سال پرانی فیضیاب مسجد اور مدرسے کے لیے چار ہفتوں کے اندر ایک متبادل اراضی الاٹ کرے، جس سے مذہبی ادارے کو ریلیف مل سکے.
اگلی سماعت 3 ستمبر 2024 کو ہو گی، جب عدالت متبادل جگہ تلاش کرنے میں ہونے والی پیش رفت کا جائزہ لے گی اور اس مسئلے کے بارے میں مزید پیش رفت کا جائزہ لے گی۔
قائم مقام چیف جسٹس منموہن اور جسٹس تشار راؤ گیڈیلا کی ڈویژن بنچ نے شمشاد علی اور دیگر کی طرف سے دائر کردہ لیٹر پیٹنٹ اپیل (ایل پی اے) کی سماعت کرتے ہوئے ڈی ڈی اے کو ہدایت دی کہ وہ ایک ہی سائز کا پلاٹ فراہم کرے اور موجودہ جگہ کے جتنا قریب ہو سکے فراہم کرے۔ جماعت اسلامی ہند کے وقف محکمہ سے تعلق رکھنے والے  اسسٹنٹ سکریٹری انعام الرحمن خان ‘شمشاد علی کو ایل پی اے دائر کرنے کی ترغیب دینے کے پیچھے اہم شخص تھے۔
دو ججوں کی بنچ نے سنگل جج تعطیلاتی بنچ کے جسٹس امت شرما کے فیصلے کو مسترد کر دیا ہے، جس نے 12 مئی کو ڈی ڈی اے کے انہدام کے فیصلے کو چیلنج کرنے والی مسجد کمیٹی کی درخواست کو مسترد کر دیا تھا اور انہیں احاطے کو خالی کرنے کے لیے ایک ماہ کی مہلت دی تھی۔
تاہم، ریلیف ایک شرط کے ساتھ آتا ہے. عدالت نے مسجد کمیٹی کو موجودہ مسجد اور مدرسہ کو ایک ہفتے کے اندر خالی کرنے کی ہدایت دی، جس سے ڈی ڈی اے کے ذریعے اس کے انہدام کی راہ ہموار ہو گی۔ عدالت نے نوٹ کیا کہ قبل ازیں ، مسجد انتظامیہ نے احاطے سے قرآن مجید کے نسخے اور دیگر مواد کو ہٹانے اور مسجد اور مدرسہ کو مسمار کرنے کے حوالے کرنے پر اتفاق کیا تھا۔یہ مسجد 1972 میں تعمیر ہوئی تھی اور 1989 میں وقف جائیداد کے طور پر دہلی وقف بورڈ کے ساتھ رجسٹرڈ ہوئی تھی۔
تاہم، اس سال مارچ-اپریل میں، مقامی پولیس نے زبانی طور پر مسجد کمیٹی کو دہلی ڈیولپمنٹ اتھارٹی کے مسجد اور مدرسہ کو منہدم کرنے کے فیصلے سے آگاہ کیا۔ ڈی ڈی اے نے دونوں جائیدادوں کو سرکاری زمین پر غیر مجاز تعمیرات قرار دیا تھا۔
مسجد کے نگراں دین محمد نے دہلی ہائی کورٹ سے رجوع کیا اور انہدام کو روکنے کے لیے ایڈوکیٹ فضیل ایوبی کے ذریعے ابتدائی درخواست دائر کی۔
جسٹس سچن دتا نے ڈی ڈی اے اور دہلی مذہبی کمیٹی کو نوٹس جاری کرتے ہوئے ممکنہ انہدام کے خلاف عبوری تحفظ فراہم کیا۔
لیکن، اچانک، دین محمد نے یو ٹرلیا اور ایک اور ایڈوکیٹ کملیش کمار مشرا کے ذریعے، اس درخواست کو واپس لینے کی درخواست کی جس میں مساجد اور مدرسوں کو تحفظ فراہم کیا گیا تھا۔جسٹس امیت شرما نے واپسی کو قبول کیا اور چار ہفتوں کے اندر احاطے کو خالی کرنے کا حکم دیا۔