ہندوستانی مسلمانوں کو موجودہ دور میں نئے چیلنجزکا سامنا: ڈاکٹراسما زہرہ

نئی دہلی:  پرویز باری
آل انڈیا مسلم ویمنز ایسوسی ایشن (اے آئی ایم ڈبلیو اے) کی صدر ڈاکٹراسماء زہرہ نے کہا کہ موجودہ دور میں ہندوستانی مسلمانوں کو نئے چیلنجز کا سامنا ہے۔ بلڈوزر سے مسلمانوں کے گھر مسمار کیے جا رہے ہیں۔ کالجوں اور سکولوں کے کیمپس میں پردہ کرنے والی حجابی خواتین اور لڑکیوں کو روکنے کے لیے قوانین نافذ کیے جا رہے ہیں۔ کچھ تعلیمی اداروں میں مسلم طلبہ کے ساتھ انتہائی بے عزتی کا برتاؤ کیا جا رہا ہے۔
ڈاکٹر زہرہ نے کہا کہ میڈیا میں مسلمانوں کے خلاف 2014 میں شروع ہونے والا جھوٹا پروپیگنڈہ بلا روک ٹوک جاری ہے۔ مسلم پرسنل لا کو تبدیل کرنے کے لیے فیصلے اور صوابدیدی قوانین بنائے جا رہے ہیں۔ وراثت اور  وقف وغیرہ کے قوانین کو ختم کرنے کی ہر وقت کوششیں جاری ہیں۔ بے گناہ نوجوان مسلمانوں کو کئی سالوں سے بغیر ثبوت یا مقدمے کے قید میں رکھا گیا ہے۔ انہوں نے نشاندہی کی کہ اس سال 4 جون کے انتخابی نتائج کے بعد جبر، بربریت، ناانصافی اور حقوق کی خلاف ورزیوں میں نمایاں اضافہ ہوا ہے۔
ڈاکٹر زہرہ نے یہ باتیں گزشتہ ہفتے نئی دہلی میں منعقدہ تین روزہ AIMWA کنونشن میں اپنے صدارتی خطاب میں کہیں۔ اس میں ملک بھر کی 18 ریاستوں سے 300 سے زیادہ مندوبین، اسکالرز، گھریلو خواتین، ڈاکٹروں، طلباء اور ماؤں نے شرکت کی۔
برندا کرات، سابق رکن پارلیمنٹ؛ سلمان خورشید، سپریم کورٹ ایڈووکیٹ؛ اور  اڑیسہ اسمبلی کی نو منتخب ایم ایل اے صوفیہ فردوس نے کنونشن میں بطور مہمان خصوصی شرکت کی۔ کنونشن میں مختلف شعبوں میں ماہر مسلم خواتین کو "چیمپئن آف چینج” ایوارڈز پیش کیے گئے۔
۔اڑیسہ کی پہلی خاتون ایم ایل اے صوفیہ فردوس، جو اس موقع پر مہمان خصوصی تھیں، نے اپنی تقریر کے ذریعے خواتین کی حوصلہ افزائی کی۔ انہوں نے اڑیسہ قانون ساز اسمبلی تک پہنچنے کے اپنے سیاسی سفر کو بیان کرتے ہوئے کامیابی حاصل کرنے کے لیے سخت محنت، لگن پر زور دیا۔
ناگپور کی جنرل سکریٹری عظمیٰ پاریکھ نے اے آئی ایم ڈبلیو اے کی گزشتہ سال کی سرگرمیوں پر ایک رپورٹ پیش کی۔ انہوں نے متعدد ریاستوں میں خواتین اور طلباء کے لیے مختلف تعلیمی، ترقیاتی اور ثقافتی پروگراموں پر روشنی ڈالی(اMuslim mirror )