ودیشا:یہ مندر نہیں مسجد ،اے ایس آئی  کے بیان سے  ہندو تنظیمیں مشتعل

مدھیہ پردیش کے مسجد کمال مولا-بھوج شالہتنازع ابھی تھما نہیں ہے کہ  کے  اب ودیشا میں مندر-مسجد کا تنازعہ سامنے آیا ہے۔ اے بی پی کی خبر کے مطابق یہاں واقع وجئے سوریہ مندر کو آرکیولوجیکل سروے آف انڈیا نے 1951 کے گزٹ نوٹیفکیشن کا حوالہ دیتے ہوئے بیجا منڈل مسجد قرار دے دیا ہے۔ اے ایس آئی کے اس خط کے بعد ہندو تنظیمیں مشتعل  ہوگئی ہیں اور اس سلسلے میں وجئے مندر مکتی سیوا سمیتی کے اراکین نے کلکٹر کو عرضداشت سونپتے ہوئے بیجامنڈل کو مسجد بتائے جانے پر سخت اعتراض ظاہر کیا ہے۔
اے بی پی نیوز میں شائع ایک رپورٹ کے مطابق وجئے مندر مکتی سیوا سمیتی کے اراکین کے ذریعہ رکن قانون سازیہ مکیش ٹنڈن کی قیادت میں کلکٹریٹ پہنچ کر ڈی ایم اور ایس پی کے نام اس معاملے پرعرضداشت سونپی گئی اور مرکزی حکومت کو خط لکھ کر اس مقام کا دوبارہ سروے کرنے کا مطالبہ کیا گیا۔ مکیش ٹندن نے بتایا کہ ہندو-مسلم کا تنازعہ الگ مقام دیے جانے کے بعد پوری طرح ختم ہو چکا ہے۔ بتایا جاتا ہے کہ مسلم لوگ بھی اے ایس آئی کے فیصلے کو لے کر ہندوؤں کی حمایت میں ہیں۔ دوسری طرف ڈی ایم کا کہنا ہے کہ جو اے ایس آئی کے دستاویزوں میں بتایا گیا تھا، اسی کو انہوں نے اپنے خط میں لیا ہے۔ ناگ پنچمی پر پوجا کو لے کر جو روایت اور عوامی جذبات پہلے سے چلے آرہے ہیں اسی کو پورا کیا جا رہا ہے۔
واضح ہو کہ دہائیوں سے ہندو عقیدت مند ناگ پنچمی پر اس مقام کے باہر مذہبی رسومات کی ادائیگی کرتے تھے۔ اسی سلسلے میں کچھ تنظیموں نے احاطے میں داخلہ اور پوجا کرنے کی اجازت مانگی جس پر ضلع مجسٹریٹ نے لوگوں کے مطالبہ سے جڑے خط کو اے ایس آئی کے پاس بھیج دیا۔ اس کے بعد اے ایس آئی نے خط کا جو جواب دیا، اس سے تنازعہ پیدا ہوگیا۔ اے ایس آئی نے 1951 کے گزٹ نوٹیفکیشن کا حوالہ دیتے ہوئے اس مقام کو بیجا ‘منڈل مسجد’ کی شکل میں درجہ بندی کی ہے۔