ممبئی پولیس نے ایک نجومی کو بڑے دہشت گردانہ حملوں کی جھوٹی دھمکیاں دینے کے الزام میں گرفتار کیا ہے۔ نجومی نے یہ حرکت اپنے ایک مسلمان دوست کو پھنسانے کے لیے کی تھی لیکن ممبئی پولیس نے معاملے کی تہہ تک پہنچ کر 51 سالہ نجومی اشون کمار سپرا کو نوئیڈا سے گرفتار کر لیا۔
پولیس کے مطابق ممبئی پولیس کو جمعہ کی صبح ایک واٹس ایپ پیغام موصول ہوا جس میں دعویٰ کیا گیا کہ شہر کے کئی علاقوں میں بم نصب کیے گئے ہیں۔ یہ علاقے دادر، بائیکلہ، سیون اور کچھ دوسرے بھیڑ والے مقامات تھے، جہاں گنیش وسرجن کے دوران لاکھوں لوگ جمع ہوتے ہیں۔ پیغام میں کہا گیا ہے کہ ہفتہ کو جب گنیش وسرجن ہو گا تو ان جگہوں پر بم پھٹے جائیں گے۔اس پیغام میں دھمکی دی گئی تھی کہ شہر میں 34 "انسانی بم” نصب کیے گئے ہیں اور 14 پاکستانی دہشت گرد ہندوستان میں داخل ہو چکے ہیں۔ ممبئی پولیس نے کہا، "خود کو ‘لشکر جہادی’ کہنے والی تنظیم نے پیغام میں کہا ہے کہ 14 پاکستانی دہشت گرد ہندوستان میں داخل ہوئے ہیں۔دھمکی آمیز پیغام میں یہ بھی لکھا گیا تھا کہ دھماکے کے لیے 400 کلو گرام آر ڈی ایکس استعمال کیا جائے گا”۔پیغام میں کہا گیا ہے کہ یہ دھماکے "پورے شہر کو ہلا کر رکھ دیں گے” اور "ایک کروڑ لوگ ہلاک ہو سکتے ہیں۔” دھمکی کا وقت بھی کافی چونکا دینے والا تھا، کیونکہ یہ پیغام ممبئی میں گنیش وسرجن سے صرف ایک دن پہلے آیا تھا۔ جس کی وجہ سے جمعہ کو پورے شہر میں ہائی الرٹ جاری کر دیا گیا تھا اور سکیورٹی سخت کر دی گئی تھی۔پولیس نے فوری کارروائی کرتے ہوئے اس نمبر کا سراغ لگا لیا جس سے دھمکی بھیجا گیا تھا۔ پولیس نے جب چھان بین کی تو پتہ چلا کہ یہ پیغام نوئیڈا (اتر پردیش) سے آیا تھا۔ ممبئی پولیس نے نوئیڈا پولیس کے ساتھ مل کر فوری کارروائی کی اور مشتبہ اشون کی شناخت کرلی۔ اور اسے جمعہ کی شام نوئیڈا کے سیکٹر 79 سے گرفتار کیا گیا تھا۔ اشون اصل میں بہار کا رہنے والا ہے لیکن پچھلے پانچ سالوں سے نوئیڈا میں رہ رہا تھا۔ وہ نجومی ہے۔ تاہم، وہ اپنے مستقبل کو پڑھنے میں ناکام رہا۔ پولیس نے اشون کا موبائل اور سم کارڈ ضبط کر لیا ہے اور اسے نوئیڈا سے ممبئی لایا جا رہا ہے۔
نجومی اشون نے اپنے دوست کو کیوں پھنسایا: اشون کے خلاف درج ایف آئی آر کے مطابق اس نے اپنے دوست فیروز کو پھنسانے کے لیے ممبئی ٹریفک پولیس کو یہ دھمکی آمیز پیغام بھیجا تھا۔ اشون نے بتایا کہ 2023 میں اشون کو فیروز کی شکایت پر پٹنہ کے پھلواری شریف میں گرفتار کیا گیا تھا۔ اشون کو تین ماہ تک جیل میں رہنا پڑا۔ اس کا بدلہ لینے کے لیے اشون نے ممبئی پولیس کو واٹس ایپ پر دھمکی آمیز پیغام بھیجا اور پیغام میں فیروز کا نام استعمال کیا۔
