رام پور:(ایجنسی)
اترپردیش اسمبلی انتخابات 2022 کو لے کر ریاست میں سیاسی سرگرمیاں تیز ہوگئی ہیں۔ اس دوران سبھی کی نظریں رام پور پر جمی ہوئی ہیں۔ جیل میں بند سماج وادی پارٹی کے رکن پارلیمنٹ اعظم خاں کے بیٹے عبداللہ اعظم خاں یہاں کی سوار اسمبلی سیٹ سے انتخابی میدان میں ہیں۔ بتایا جا رہا ہے کہ ایس پی امیدوار عبداللہ اعظم کا پرچہ نامزدگی خارج ہونے کا خدشہ ہے ۔اس کے پیش نظر جمعرات کو عبداللہ اعظم کی والدہ اور اعظم خاں کی اہلیہ تزئن فاطمہ نے سوار اسمبلی سیٹ سے آزاد امیدوار کے طور پر پرچہ نامزدگی داخل کیا ہے۔ پرچہ نامزدگی داخل کرنے کے بعد تزئین فاطمہ نے کہا کہ حالات نے انہیں لڑنا سکھایا ہے۔
عبداللہ اعظم خاں چند روز قبل جیل سے باہر آئے ہیں۔ اس کے بعد انہوں نے سوار اسمبلی سیٹ سے ایس پی امیدوار کا پرچہ نامزدگی داخل کیاتھا۔ اب ان کا پرچہ مسترد ہونے کا امکان ہے۔ اس سب کے درمیان عبداللہ کی والدہ تزئین فاطمہ نے سوار اسمبلی سیٹ سے آزاد امیدوار کے طور پر اپنا پرچہ نامزدگی داخل کیا ہے، تاکہ ان کے بیٹے کی نامزدگی مسترد ہونے کی صورت میں وہ یہاں سے الیکشن لڑ سکیں۔ پرچہ نامزدگی داخل کرنے کے بعد باہر آئیں تزئین فاطمہ نے کہا، ‘حالات نے مجھے لڑنا سکھایا ہے۔ اب وقت آگیا ہے کہ عوام کو ظلم کے خلاف کھڑا ہونا چاہیے۔ جمہوریت میں عوام سب سے بڑی عدالت ہوتی ہے اور میں عوام کی عدالت میں جا رہی ہوں۔ عوام خود جواب دیں گے۔
