نئی دہلی:(ایجنسی)
آل انڈیا مجلس اتحاد المسلمین کےقائد حیدرآبادسے ممبر پارلیمنٹ اسدالدین اویسی پر یوپی میں قاتلانہ حملہ ہوا ہے۔ اطلاعات کے مطابق میرٹھ سے نوئیڈا جاتے وقت ان کی گاڑی پر حملہ کیاگیا جس میں وہ بال بال بچ گئے۔
نیوز ایجنسی اے این آئی سے بات چیت کےد وران اویسی نے بتایاکہ تقریباً تین سے چار گولیاں ان کی کار پر داغی گئیں، جس کی وجہ سے ان کی گاڑی کا ٹائر پنکچر ہوگیا، اس کے بعد انہوں نے وہیکل سے سفر کیا۔ انہوں نے اپنے ٹوئٹر پر لکھا کہ ’’کچھ دیر قبل چھجارسی ٹول گیٹ پر میری گاڑی پر گولیاں چلائی گئیں، چار رائونڈ فائر ہوئے، تین سے چار لوگ تھے، سب کے سب بھاگ گئے، اور ہتھیار وہیں چھوڑ گئے، میری گاڑی پنکچر ہوگئی لیکن میں دوسری گاڑی میں بیٹھ کر وہاں سے نکل گیا، ہم سب محفوظ ہیں، الحمدللہ‘‘۔
حملے کے بعد اویسی نے نئی دہلی میں کہاکہ میں الیکشن کمیشن سے اس گولی باری کی واردات کی آزادانہ جانچ کی درخواست کرتا ہوں، منصفانہ جانچ کرانے کی ذمہ داری یوپی حکومت اور مودی سرکار کی ہے میں اس معاملے پر لوک سبھا صدر سے بھی ملوں گا۔
بتایاجارہا ہے کہ جمعرات کو نوئیڈا میں امیدوار کی حمایت میں تشہیر کرنے جارہے تھے، جیسے ہی اویسی چھجاری ٹول پلازہ پر پہنچے تو ان کی گاڑی پر حملہ ہوا جس میں وہ بچ گئے۔
ہاپوڑ پولیس نے نوئیڈا کے بادل پور سےسچن کو حراست میں لیا ہے، اس کے پاس سے پستول برآمد ہوئی، سچن کا ساتھی شبھم فرار ہے، جس کی پولیس سرگرمی سے تلاش کررہی ہے۔ ذرائع کے مطابق ابتدائی پوچھ تاچھ میں معلوم ہوا ہے کہ سچن اویسی کے بیانوں سے ناراض تھا۔
اویسی کے قافلے میں شامل ایک ڈرائیور نے کہاکہ ٹول گیٹ پر ایک شخص پہلے سے کھڑا تھا، اسی نے گاڑی پر پانچ سے چھ رائونڈ گولیاں چلائیں، اس سے اویسی کی گاڑی کو نقصان پہنچا، لیکن کسی کو چوٹ نہیں آئی ہے، پولیس نے بھی کسی کے ہلاک ہونے کی بات نہیں کہی ہے۔ گولیاں چلنے کے بعد اویسی کے ساتھ موجود حامیوں کی گاڑیوں نے حملہ آور کا پیچھا کیا لیکن ان کا کچھ پتہ نہیں چل سکا ، اس دوران ایک حملہ آور اپنی گاڑی سے کودا تو اس کا اسلحہ زمین پر گر گیا۔
اس معاملے کو لے کر ایم آئی ایم کے ترجمان وسابق ممبر اسمبل مہاراشٹر وارث پٹھان نے کہاکہ ’’ابھی ابھی اسدالدین اویسی صاحب پر اترپردیش کے چھجارسی میں حملہ کی خبر ملی ہے، لیکن اللہ کے رحم وکرم سے وہ محفوظ ہیں، میں بتاناچاہتا ہو ں کہ ہم ڈرنے والے نہیں ہیں اور گھبرانے والے نہیں ہیں، لڑیں گے اور جیتیں گے‘‘۔
بی جے پی لیڈر محسن رضا نے کہاکہ حادثہ افسوسناک ہے، لیکن یہ ریاست میں ماحول خراب کرنے کا کام کیاجارہا ہے، انہو ںنے کہاکہ دیکھ لینے کی بات کون کررہا ہے؟ تحقیقات کے بعد سب صاف ہوگا کہ کس نے حملہ کیا ہے۔
