گوہاٹی :
مرکزی وزیر داخلہ امت شاہ نے بدھ کے روز آسام کے چیرانگ میں انتخابی جلسہ عام سے خطاب کیا۔ اس دوران انہوں نے کانگریس کو شدید نشانہ بنایا۔ شاہ نے کہا کہ کانگریس کبھی بھی تشدد ، دہشت گردی اور احتجاج کا خاتمہ نہیں کرنا چاہتی۔ ہم نے ڈبل انجن حکومت کے ذریعے آسام کو ترقی کی راہ پر گامزن کرنے کا کام کیا ہے ۔
تقریر کے دوران شاہ نے بدرالدین اجمل پر بھی حملہ بولا۔ وزیر داخلہ شاہ نے کہا کہ گزشتہ کل(منگل) بدر الدین اجمل نے کہا تھا کہ حکومت کی چابی میرے پاس ہے ، میں جیسے چاہوں گاسرکار چلاؤں گا ، جس کو چاہوں گا اس کو وزیر بناؤں گا۔ ارے بدرالدین حکومت کیچابی آپ کے ہاتھ میں نہیں ہے ، آسام کے لوگوں کے ہاتھ میں اس کی چابی ہے۔ کان کھول کر سن لو بدر الدین ، آسام کو دراندازیوں کا اڈہ ہم نہیں بننے دیں گے۔ آپ کو اکھاڑ کر پھینکنے کا کام بی جے پی کرے گی۔
وزیر داخلہ نے راہل گاندھی کو آسام کا سیاح بتایا۔ انہوں نے کہا کہ راہل گاندھی کہتے ہیں بدر الدین اجمل آسام کی شناخت ہیں۔ آپ مجھے بتائیں کہ کیا اجمل آسام کی شناخت ہے یا بھوپن ہزاریکا ، اپیندر ناتھ اور شنکر دیو ۔ بلیک ماؤنٹین بدرالدین اجمل آسام کی شناخت نہیں ہوسکتا ہے۔
مودی جی نے آسام کی ترقی کے لئے بہت سارا کام کیا ہے۔ برہما پتراندی پر 6 پل تعمیر کرائے ، تیل سیکٹر کی ترقی کے لئے 46 ہزار کروڑ روپے دیئے ہیں۔
پانچ سال پہلے میں اس علاقے میں آیا تھا ،تب میں نے کہا تھا کہ بی جے پی اور آسام گن پریشد کی حکومت بنا کر دیجئے ، ہم آسام کو دہشت گردی سے پاک بناکر دیں گے۔ ہم نے کہا تھا کہ ہم آسام میں تشدد کے دور کو ختم کردیں گے اور امن قائم کریں گے۔
ہم نے بوڈولینڈ معاہدہ کیا ہے اور معاہدے کے تحت دو تہائی وعدے چھ ماہ میں پورے ہوگئے ہیں۔
