گاندھی نگر :(ایجنسی)
گجرات کے اگلے وزیر اعلی کا نام سامنے آگیا ہے ۔ بھوپیندر پٹیل گجرات کے نئے وزیر اعلی ہوں گے ۔ اتوار کو گاندھی نگر میں لیجسلیچر پارٹی کی میٹنگ میں بھوپیندر سنگھ کا نام طے کیا گیا ہے ۔ بتادیں کہ بھوپیندر سنگھ گجرات کی گھاٹلودیا سیٹ سے ممبر اسمبلی ہیں ۔ بھوپیندر بھائی رجنی کانت پٹیل نے اسمبلی انتخابات 2017 میں احمد آباد ضلع کی گھاٹلوڈیا سیٹ سے کانگریس کے ششی کانت واسودیو بھائی پٹیل کو ہرایا تھا۔
بتایا جارہا ہے کہ بھوپیندر پٹیل آج ہی گورنر سے ملاقات کرکے سرکار بنانے کا دعوی پیش کرسکتے ہیں ۔ کہا یہ بھی جارہا ہے کہ گورنر سے ملاقات کے بعد بھوپیندر پٹیل منگل کو وزیر اعلی کے عہدہ کا حلف لے سکتے ہیں ۔
بتادیں کہ وزیر اعلی کی ریس میں مرکزی وزیر منسکھ منڈاویا ، پروشوتم روپالا ، لکشدیپ کے ایڈمنسٹریٹر پرفل پٹیل ، نائب وزیر اعلی نتن پٹیل ، سی آر پاٹل اور گوردھن جھڑفیا بھی تھے ، لیکن گجرات بی جے پی لیجسلیچر پارٹی کی میٹنگ میں حتمی مہر بھوپیندر پٹیل کے نام پر لگی ۔
