بی جے پی لیڈر کا خواب !یہ ہم طے کریں گے کہ بھارت میں کس کو رہنا ہے

لکھنؤ ؍ ہردوئی :(ایجنسی)

یوپی الیکشن سے پہلے سابق ایم پی اور بی جے پی لیڈر نریش اگروال نے اقلیتوں کو لے کر بڑا بیان دیا ہے۔ انہوں نے اتوار کو ہردوئی میں کشتریہ سماج کی روشن خیال کانفرنس میں بطور مہمان خصوصی شرکت کی تھی۔ انہوں نے اپنے بیان میں کہا، ’ہم یہ طے کریں گے کہ ہندوستان میں کس کو رہنا ہے اور کسے نہیں۔‘ انہوں نے ایس پی سربراہ اکھلیش یادو پر بھی سخت نشانہ سادھا۔ انہوں نے آئندہ انتخابات میں بی جے پی کی جیت کا دعویٰ کیا۔

روشن خیال طبقے کی کانفرنس میں بی جے پی رہنما نریش اگروال نے کہا، ’اگر ہندو دیوی دیوتاؤں کو ہندوستان میں نصب نہیں ہوں گے توکیا پاکستان میں نصب کئے جائیں گے؟ ہم نے مندر بنانے کا وعدہ کیا تھا اور مندر بن رہا ہے۔ نریش اگروال نے لال ٹوپی کا موازنہ خونی ٹوپی سے کیا۔ انہوں نے کہا کہ ‘لال رنگ جدوجہد کی نہیں بلکہ خون کی علامت ہے۔

بی جے پی لیڈر نے کہا کہ سماج وادی پارٹی کئی پارٹیوں کے ساتھ اتحاد کر رہی ہے۔ اتحاد وہی کرتے ہیں جو کمزور ہوتے ہیں۔ ان کا کہنا تھا کہ جب کمزور کسی سے لڑنے نکلتے ہیں تو اتحاد بناتے ہیں۔ نریش اگروال نے کہا کہ اکھلیش یادو کہتے ہیں کہ وہ 403

میں سے 400 سیٹیں جیت رہے ہیں۔ انہوں نے دعویٰ کیا کہ اس بار بھارتیہ جنتا پارٹی کی حکومت مکمل اکثریت کے ساتھ بننے والی ہے۔