نئی دہلی :(ایجنسی)
سپریم کورٹ نے کسی بھی شخص کو آنکھ بند کر کےغیر معینہ مدت کے لیے جیل میں رکھے جانے پر سوال اٹھایا ہے۔ اس نے کہا گیا ہے کہ ایسے معاملے میں جس میں تفتیش جاری ہے، اس خدشے پر کسی کو غیر معینہ مدت تک جیل میں نہیں رکھا جا سکتا ہے کہ ملزم کسی بڑی سازش میں ملوث ہو سکتا ہے یا یہ قومی سلامتی کے لیے خطرہ ہو سکتا ہے۔
یہ تبصرہ پیر کو جسٹس ڈی وائی چندر چوڑ اور دنیش مہیشوری کی بنچ نے سرحد پار مویشیوں کی اسمگلنگ کیس میں مبینہ طور پر اہم ملزم محمد انعام الحق کو ضمانت دیتے ہوئے کیا ۔ مرکزی ایجنسی نے بی ایس ایف کے ایک کمانڈنٹ کو بھی اس کیس میں مبینہ طور پر ملوث ہونے پر گرفتار کیا تھا۔ اس میں مبینہ طور پر سیاسی جماعتوں اور مقامی انتظامیہ کا کردار بھی بے نقاب ہوا تھا۔
سپریم کورٹ کا یہ فیصلہ اس کے اصول کے عین مطابق لگتا ہے جس میں وہ کہتا رہا ہے کہ ضمانت کو فروغ دینا چاہیے جیل میں قید کو نہیں۔ سپریم کورٹ نے گزشتہ ماہ دسمبر میں اس بات پر تشویش ظاہر کی تھی کہ متعدد ہدایات کے باوجود نچلی عدالتوں کی جانب سے ضمانت کی حوصلہ افزائی کرنے میں ہچکچاہٹ کا مظاہرہ کیا گیا ہے۔ سپریم کورٹ نے کہا تھا کہ ایسی عدالتوں کی ذہنیت کو بدلنے کی ضرورت ہے۔
ویسے انصاف کا ایک بنیادی اصول یہ بھی ہوتا ہے کہ بھلے ہی مجرم بچ بھی جائے ،لیکن بے گناہ کو سزا نہیں ملنی چاہیے۔ سپریم کورٹ نے اسی بنیاد پر ضمانت اور قید کا فیصلہ کیا تھا۔
سپریم کورٹ نے کئی احکامات میں انفرادی آزادی کو ایک اہم پہلو سمجھا ہے۔ گزشتہ ماہ سپریم کورٹ نے کہا تھا کہ ایسے معاملات میں گرفتاریاں معمول کے مطابق نہیں کی جانی چاہئیں جب ملزم تفتیش میں تعاون کر رہا ہو اور اس بات پر یقین کرنے کی کوئی وجہ نہیں ہے کہ وہ شخص فرار ہو جائے گا یا تفتیش کو متاثر کرے گا۔
عدالت نے اکتوبر میں اپنی ایک ہدایت میں کہا تھا کہ اگر کوئی ملزم تفتیش میں تعاون کرتا ہے اور تفتیش کے دوران اسے گرفتار نہیں کیا جاتا ہے تو اسے چارج شیٹ داخل کرتے وقت حراست میں نہیں لیا جانا چاہئے۔
سپریم کورٹ نے یہ بھی واضح کیا کہ ٹرائل کورٹ بھی چارج شیٹ کو قبول کرنے سے انکار نہیں کرسکتی کیونکہ ملزم کو گرفتار کرکے عدالت میں پیش نہیں کیا گیا تھا۔
تاہم، تازہ ترین معاملے میں، سینئر وکیل مکل روہتگی نے، انعام الحق کی طرف سے پیش ہوتے ہوئے کہا کہ اس معاملے میں ملزم بی ایس ایف کمانڈنٹ کے ساتھ ساتھ دیگر ملزمان کو بھی ضمانت دی گئی تھی، لیکن کلکتہ ہائی کورٹ نے حق کی ضمانت کی درخواست کو مسترد کر دیا تھا۔ انہوں نے کہا کہ حق ایک ایسے کیس میں ایک سال سے زائد عرصے تک جیل میں رہے جس میں زیادہ سے زیادہ سات سال قید کی سزا ہو سکتی ہے۔
سی بی آئی کے ایڈیشنل سالیسٹر جنرل امن لیکھی نے کہا کہ عرضی گزار ہندوستان-بنگلہ دیش سرحد کے ذریعے سرحد پار مویشیوں کی اسمگلنگ کے لیے بی ایس ایف کے اہلکار، کسٹم حکام، مقامی پولیس اور دیگر کو شامل کرنے والے ریکٹ کا سرغنہ ہے۔ انہوں نے کہا کہ اس سے مقامی پولیس کی ملی بھگت کی نشاندہی ہوتی ہے اور قومی سلامتی کے لیے سنگین تشویش پیدا ہوتی ہے۔
جب انہوں نے کہا کہ ایک بڑی سازش کی تحقیقات ابھی باقی ہے، جسٹس چندر چوڑ اور مہیشوری نے پوچھا، ‘جب دیگر ملزمان کو ضمانت مل گئی ہے تو ایک شخص کو غیر معینہ مدت تک حراست میں رکھنے سے بڑی سازش کی تحقیقات میں کیسے مدد ملے گی؟ کیا ایک سال اور دو ماہ جس کے لیے وہ حراست میں ہے کسی بڑی سازش کی تفتیش کے لیے کافی نہیں؟
