نئی دہلی :(ایجنسی)
ملک میں کورونا کے نئے ویرینٹ ’اومیکرون‘ کی بڑھتی ہوئی رفتار نے حکومت کی تشویش میں اضافہ کر دیا ہے۔ اس سلسلے میں جہاں وزارت صحت میں میٹنگوں کا دور جاری ہے، وہیں آج یعنی جمعرات کو وزیر اعظم مودی نے ملک میں کورونا کی صورتحال کو لے کر حکام کی میٹنگ بلائی ہے۔ اس کے علاوہ دہلی کے وزیر اعلیٰ اروند کیجریوال نے بھی آج میٹنگ بلائی ہے۔ توقع ہے کہ میٹنگ کے بعد وہ دہلی کے لیے نئی ہدایات جاری کریں گے۔ دریں اثنا، ملک میںاومیکرون ویرینٹ سے متاثرہ مریضوں کی کل تعداد اب 280 ہے۔ ان میں سے مہاراشٹر میں سب سے زیادہ 65، دہلی میں 57، تمل ناڈو میں 34، تلنگانہ میں 24، راجستھان میں 22، کرناٹک میں 19 کے ساتھ ساتھ ہریانہ میں پہلا کیس سامنے آیا ہے۔ اسی وقت گجرات میں بدھ کو اومیکرون کے نو معاملے سامنے آئے ہیں۔ گجرات میں کل 23 معاملے درج کیے گئے ہیں۔ کیرالہ (24)، اتر پردیش میں (2) کیس ہیں۔ آندھرا پردیش میں دو، مغربی بنگال، اتراکھنڈ اور چنڈی گڑھ میں ایک ایک کیس ہے۔
واضح رہے کہ مغربی بنگال کے نادیہ میں نوودیا اسکول میں 29 بچے کورونا سے متاثر پائے گئے ہیں۔ یہ سبھی رہائشی اسکول کے نویں اور دسویں جماعت کے طالب علم ہیں۔ وہیں، ہماچل پردیش کے بلاس پور کے ایک اسکول میں 23 بچے کورونا سے متاثر پائے گئے ہیں۔
بھارت میں گزشتہ 24 گھنٹوں میں کورونا کے 7495 کیسز سامنے آئے ہیں۔ وزارت صحت کے جمعرات کے اعداد و شمار کے مطابق بھارت میں گزشتہ 24 گھنٹوں کے دوران کورونا کے 7495 نئے کیسز سامنے آئے ہیں اور 434 لوگوں کی موت ہوئی ہے۔ اس دوران 6960 افراد صحت یاب بھی ہوئے۔ وہیں بدھ کو جاری کردہ اعداد و شمار کے مطابق ملک میں 24 گھنٹوں کے اندر 6,317 نئے کورونا مریض سامنے آئے اور 318 افراد کی موت ہو گئی۔
