لکھنؤ :(ایجنسی)
کورونا کے نئے ویرینٹ اومیکرون( Omicron )کی گھبراہٹ کے درمیان یوگی حکومت نے ایک بڑا فیصلہ لیا ہے۔ سی ایم یوگی نے 25 دسمبر سے ریاست میں نائٹ کرفیو کا اعلان کیا ہے۔ ساتھ ہی شادی بیاہ کے پروگراموں میں کووڈ پروٹوکول کے ساتھ 200 لوگوں کو اجازت دی جائے گی۔ اس سلسلے میں وزیر اعلیٰ یوگی آدتیہ ناتھ نے اعلیٰ سطحی ٹیم-09 کو ہدایات دی ہیں۔
ملک کی مختلف ریاستوں میں کووڈ کے معاملات میں اضافہ ہو رہا ہے۔ ایسے میں ریاست میں 25 دسمبر سے نائٹ کرفیو نافذ ہو جائے گا۔ نائٹ کرفیو ہر روز 11 بجے سے صبح 5 بجے تک نافذ رہے گا۔
بازاروں میں ’ماسک نہیں، توسامان نہیں‘
بازاروں میں ’’نو ماسک، نو مال‘‘ کے پیغام کے ساتھ تاجروں کو آگاہ کرنے کی ہدایات دی گئی ہیں۔ سڑکوں، بازاروں میں ہر ایک کے لیے ماسک لازمی ہے۔ ملک کی کسی بھی ریاست یا بیرون ملک سے یوپی کی سرحد پر آنے والے ہر شخص کی ٹریسنگ ٹیسٹنگ کی ہدایات دی گئی ہیں۔ اس کے ساتھ ساتھ بس، ریلوے اور ایئرپورٹ پر اضافی چوکسی برتی جائے گی۔
گزشتہ 24 گھنٹوں میں ریاست میں 1 لاکھ 91 ہزار 428 سیمپل کی جانچ ہوئی، جس میں 49 نئے متاثرین کی تصدیق ہوئی ہے۔ ریاست میں کووڈ کے فعال کیسوں کی کل تعداد 266 ہے، جبکہ 16 لاکھ 87 ہزار 657 مریضوں نے کورونا کو شکست دی ہے۔ جمعہ کو 37 اضلاع میں کووڈ کا ایک بھی مریض نہیں ملا۔
واضح رہے کہ اس سے قبل مدھیہ پردیش کی شیوراج حکومت نے گزشتہ کل ریاست میں نائٹ کرفیو لگانے کا اعلان کیا تھا۔ اومیکرون کی ممکنہ لہر کے پیش نظر مدھیہ پردیش نائٹ کرفیو نافذ کرنے والی پہلی ریاست ہے۔ یہاں بھی رات گیارہ بجے سے صبح پانچ بجے تک نائٹ کرفیو جاری رہے گا۔ خاص بات یہ ہے کہ مدھیہ پردیش میں اومیکرون کا ایک بھی کیس رپورٹ نہیں ہوا ہے۔ شیوراج سنگھ چوہان نے کہا، اس بات کا امکان ہے کہ جلد ہی ایم پی میں اومیکرون کے معاملے سامنے آسکتے ہیں۔ ضرورت پڑنے پر مزید اقدامات کیے جائیں گے۔ دہلی کی کیجریوال حکومت نے بھی کئی چیزوں پر پابندی لگا دی ہے۔
تیسری لہری کی آہٹ
اومیکرون کی دستک کے بعد ماہرین اسے کورونا کی تیسری لہر کی علامت کے طور پر دیکھ رہے ہیں۔ آئی آئی ٹی کے سینئر سائنسدان پدم شری پروفیسر منیندرا اگروال نے بھی نئی تحقیق کا حوالہ دیتے ہوئے کہا کہ کورونا وائرس کے نئے ویرینٹ اومیکرون کا اثر دسمبر کے آخری ہفتے تک نظر آئے گا۔ انہوں نے کہا تھا کہ جنوری کے آخری ہفتے یا فروری کے شروع میں اومیکرون کا پیک ہوگا ۔
کورونا سے بچاؤ کے لیے بھیڑ میں نہ جانے، ماسک پہننے اور ویکسین لینے کا مشورہ دیا جا رہا ہے۔ مرکزی صحت کے سکریٹری راجیش بھوشن نے ریاستوں اور مرکز کے زیر انتظام خطوںکو مشورہ دیا ہے کہ وہ چوکس رہیں اور معاملات کی مثبتیت، دوگنا ہونے کی شرح اور نئے کیسوں کے کلسٹر پر نظر رکھیں اور کرسمس اور نئے سال سے پہلے مقامی سطح پر پابندیاں عائد کرنے پر غور کریں۔
