نئی دہلی:(ایجنسی)
یوم جمہوریہ کے موقع پر دہلی میں 20 سالہ لڑکی کو اغوا کرکے اجتماعی عصمت دری کی گئی۔ پولیس نے اس معاملے میں چار ملزمان کو گرفتار کر لیا ہے۔ پولیس کا کہنا ہے کہ ملزم نے لڑکی سے ذاتی دشمنی کی بنا پر اس واردات کو انجام دیا ہے۔
یہی نہیں لڑکی کے بال بھی کاٹ دیے گئے، اس کے گلے میں جوتوں کے ہار ڈال کر اس کا منہ کالا کر کے اسے گلیوں میں گھمایا گیا اور اس دوران مقامی لوگ اس پورے تماشے میں شامل رہے۔ یہ واقعہ وویک وہار علاقے میں پیش آیا۔
لڑکی کے بارے میں بتایا گیا ہے کہ وہ شادی شدہ ہے اور اس کا ایک بچہ بھی ہے۔ پڑوس میں رہنے والا ایک نوجوان مسلسل لڑکی کا پیچھا کر رہا تھا اور گزشتہ سال نومبر میں اس نے خودکشی کر لی تھی۔
اس نوجوان کے اہل خانہ کا کہنا ہے کہ نوجوان نے لڑکی کی وجہ سے خودکشی کی ہے۔ خاتون کی بہن نے پولیس کو واقعے کی اطلاع دے دی ہے۔
لڑکی کی کو گلیوں میں بھیڑ کے ساتھ گھمائے جانے کا ویڈیو سوشل میڈیا پر وائرل ہو گیا ہےاس میں تمام خواتین ہیں اور ان میں سے کچھ لڑکی کو تھپڑ مار رہی ہیں اورباقی لوگ تالیاں بجا رہے ہیں۔
دہلی کمیشن برائے خواتین کی چیئرپرسن سواتی مالیوال نے اس واقعہ کا علم ہونے کے بعد لڑکی سے ملاقات کی ہے اور اس معاملے میں دہلی پولیس کو نوٹس بھی جاری کیا ہے۔ پولیس کا کہنا ہے کہ لڑکی کی کونسلنگ کی جارہی ہے اور اس کی ہر ممکن مدد بھی کی جارہی ہے۔
