اظہار یک جہتی:پرینکا  فلسطین لکھا  بیگ لے کر پارلیمنٹ پہنچیں، بی جے پی کو  کسی کی چاپلوسی نظر آئی

نئی دہلی: کانگریس کی رکن پارلیمنٹ پرینکا گاندھی واڈرا پیر کو ایک ہینڈ بیگ کے ساتھ پارلیمنٹ پہنچیں جس پر فلسطین کے لوگوں کے ساتھ یکجہتی کا اظہار کرتے ہوئے ‘فلسطین’ لکھا ہوا تھا۔  بی جے پی کے رکن پارلیمنٹ سمبیت پاترا نے کہا کہ گاندھی خاندان ہمیشہ خوشامد کا بیگ ڈھوتارہاہے  ۔اور انتخابات میں ان کی شکست کی وجہ بھی خوشامد  کا بیگ ہے۔ اس پر کانگریس کا ردعمل نہیں آیا ہے خبر کے مطابق پرینکا گاندھی واڈرا کی ایک تصویر سوشل میڈیا پر تیزی سے وائرل ہو رہی ہے، جس میں وہ اپنے ہاتھ میں ‘فلسطین’ لکھا ایک بیگ لیے پارلیمنٹ پہنچتی نظر آ رہی ہیں۔ اس بیگ پر امن کی علامت سفید کبوتر اور تربوز کا سرخ ٹکڑا بھی بنا ہوا ہے، جو فلسطین کے تئیں ان کی حمایت کو واضح طور پر ظاہر کرتا ہے۔ پرینکا گاندھی نے اس بیگ کے ذریعے ایک صاف پیغام دیا ہے کہ وہ فلسطین کے حق میں کھڑی ہیں۔یہ کوئی پہلی بار نہیں ہے جب پرینکا گاندھی نے فلسطین کی حمایت کی ہو۔ اس سے قبل بھی وہ متعدد مواقع پر فلسطین کے حق میں آواز اٹھا چکی ہیں۔ انہوں نے حکومت ہند سے مطالبہ کیا تھا کہ فلسطین کے ساتھ کھڑے ہوں اور ان کی حمایت کریں۔ اس سے قبل، پرینکا گاندھی نے فلسطین کے سفیر سے ملاقات بھی کی تھی اور غزہ میں اسرائیلی فوج کی کارروائیوں کی مذمت کی تھی۔