نئی دہلی :(ایجنسی)
سوشل میڈیا سائٹس فیس بک ، انسٹاگرام اور وہاٹس ایپ کی سروس پیر کو عالمی سطح پر ڈاؤن ہونے کی خبر ہے ، جس کی وجہ سے یوزرس کو کافی پریشانیوں کا سامنا کرنا پڑ رہا ہے ۔ فیس بک ویب سائٹ پر ایک پیغام میں کہا گیا ہے کہ ‘معاف کریں ، کچھ غلط ہوگیا ، ہم اس پر کام کررہے ہیں اور ہم اس کو جلد سے جلد ٹھیک کرلیں گے ۔
صارفین نے ٹوئٹر پر پیغام پوسٹ کرتے ہوئے کہا کہ مقبول سوشل نیٹ ورکنگ سائٹس اور انسٹینٹ میسیجنگ پلیٹ فارم وہاٹس ایپ ہندوستانی وقت کے مطابق رات نو بجے کے آس پاس سے کام نہیں کررہے تھے ۔
ویب سروسز کو ٹریک کرنے والی ویب سائٹ ڈاون ڈیٹیکٹر ڈاٹ کام نے بھی کہا کہ یوزرس کافی تعداد میں شکایت کررہے ہیں ۔ پورٹل کے مطابق فیس بک اور انسٹاگرام سے وابستہ 20 ہزار سے زائد شکایتیں رپورٹ ہوئی ہیں ۔
اس درمیان سوشل میڈیا انسٹینٹ پلیٹ فارم وہاٹس ایپ بھی 14 ہزار سے زائد صارفین کیلئے بند تھا جبکہ میسینجر تقریباً تین ہزار صارفین کیلئے ڈاؤن تھا ۔ فیس بک کی ملکیت والی تینوں کمپنیاں انسٹینٹ میسیجنگ ، فوٹو شیئرنگ اور سوشل نیٹ ورکنگ کی اپنی کٹیگریوں میں ہندوستان میں مارکیٹ لیڈر ہیں ۔
ہندوستان میں فیس بک کے 410 ملین سے زیادہ صارفین ہیں اور اس کا وہاٹس ایپ میسینجر ایپ 530 ملین سے زیادہ صارفین کے ساتھ ملک کو اپنا سب سے بڑا بازار مانتا ہے ۔ ہندوستان میں انسٹاگرام کے 210 ملین سے زیادہ یوزرس ہیں ۔
