چار شہید بچوں کا باپ؛ہر آنکھ ہوئی نم

غزہ:
فلسطین کے علاقے غزہ کی پٹی پر اسرائیلی فوج کی طرف سے گزشتہ پیر سےنہتے اور بے گناہ فلسطینیوں پر وحشیانہ بمباری کے دوران دل دہلا دینے والے مناظر سامنے آ رہے ہیں۔ سوشل میڈیا پر ایک ویڈیو سامنے آئی ہے جس میں چار کم سن شہید بچوں کے والد کو بچوں کی بےدردی سے شہادت پر صدمے سے نڈھال دیکھا جا سکتا ہے۔
حماس کے خلاف غزہ کی پٹی میں شروع کی گئی اسرائیلی بمباری کے دوران ایک سو سے زائد فلسطینی شہید ہوچکے ہیں جن میں بڑی تعداد بچوں کی ہے۔
سوشل میڈیا پر وائرل ہونے والی ویڈیو میں دیکھا جاسکتا ہے کہ ایک شخص جس کے چار بچے اسرائیلی بمباری میں شہید ہوئے ہیں، صدمے سے نڈھال ہےاور رو رو کر بچوں کو پکار رہا ہے۔
خیال رہے کہ اسرائیلی فوج نے گذشتہ سوموار کو غزہ کی پٹی پروحشیانہ بمباری شروع کی تھی جو ابھی تک جاری ہے۔ آج جمعہ کے روز اسرائیلی فوج نے غزہ کی پٹی کے شمال میں سرنگوں کا ایک نیٹ ورک تباہ کرنے کے لیے توپ خانے اور جنگی طیاروں سے حملہ کیا۔ یہ بمباری غزہ کی پٹی میں ممکنہ زمینی کارروائی کی راہ ہموار کرنے کے لیے شروع کی گئی ہے۔

اسرائیلی ریاستی دہشت گردی میں اب تک 119 فلسطینی شہید اور 830 زخمی ہوچکے ہیں جب کہ فلسطینیوں کے حملوں میں 9 صہیونی جھنم واصل ہوئے ہیں۔