قابل تقلید!دس سال کی کڑی محنت نے فیروز کو کانسٹیبل سے اے سی پی بنایا

نئی دہلی :
کہتے ہیںہمت مرداں مدد خدا……اس کا ایک نمونہ دہلی میں دیکھنے کوملاہے، یہاں دہلی پولیس کانسٹیبل نے اپنی لگن اور محنت کے سبب یو پی ایس سی کا امتحان پاس کیا ہے۔ ہم بات کر رہے ہیں، دہلی پولیس کی پی سی آر یونٹ میں تعینات کانسٹیبل فیروز عالم کی، جنہوں نے حال ہی میں یو پی ایس سی کا امتحان پاس کیا ہے اور ڈانکس (DANICS)کے تحت اب وہ دہلی پولیس میں اے سی پی کی تربیت لے رہے ہیں۔
فیروز عالم نے دہلی پولیس میں بطور کانسٹیبل 10 سال نوکری کی۔ اس کے ساتھ ہی وہ مسلسل مسابقتی امتحانات کی تیاری بھی کرتے رہے۔ انہوں نے کی ملک کی سب سے معتبر یوپی ایس سی (UPSC)کی تیاری اور امتحان کوالیفائی کرکے یہ ثابت کردیا کہ محنت آخر کار رنگ ضرور لاتی ہے۔ فیروز عالم دہلی پولیس میں اے سی پی بن گئے ہیں۔ فی الحال ان کی ٹریننگ دہلی پولیس ٹریننگ سینٹر جھونڈہ کلاں میں چل رہی ہے اور اگلے سال مارچ تک انہیں تعیناتی بھی مل جائے گی۔
فیروز عالم بنیاد طور پر ہاپوڑ پلکھوا کے رہنے والے ہیں، ان کی پیدائش پلکھوا کے اعظم پور دیہرا گاؤں میں ہوئی تھی۔ محمد شہادت و منی بانو کے گھر میں پیدا ہوئے فیروز نے 12 ویں کلاس پاس کرنے کے بعد 2010 میں دہلی پولیس میں بطور کانسٹیبل نوکری شروع کی۔ فیروز کے پانچ بھائی وتین بہن ہیں۔
فیروز کہتے ہیں کہ سال 2010 میں دہلی پولیس میں جوائن کرنے کے بعد میں اپنے سینئر افسروں کے کام کاج کے طریقے اور ان کے رتبے سے کافی متاثر ہوا۔ انہیں دیکھ کر میں نے بھی طے کرلیا تھا کہ مجھے بھی افسر بننا ہے اور اس کا واحد ذریعہ تھا یو پی ایس سی، ایسے میں کانسٹیبل کی نوکری کے ساتھ امتحان کی تیاریوں میں مصروف ہوگیا۔
فیروز نے کہا کہ یو پی ایس سی پاس کرنا جیسا میں نے سوچا تھای اتنا آسان نہیں تھا۔ میں لگاتار فیل ہوتا گیا۔ پانچ بار ناکام ہونے کے بعد میں نے افسر بننے کا خواب دیکھنا تقریباً چھوڑ دیا۔ مگر میرے ساتھ ہی راجستھان کے جھنجھنو ضلع کے نول گڑھ تحصیل کے گاؤں دیوی پورا کے وجے سنگھ گوجر جب دہلی پولیس کانسیٹبل سے آئی پی ایس بنے تو مجھے بھی ہمت آئی اور میں نے چھٹی بار کوشش کی۔ سال 2019 میں میں نے 645 رینک کے ساتھ یو پی ایس سی پاس کیا۔