علی گڑھ:
علی گڑھ مسلم یونیورسٹی (اے ایم یو) کے نام ایک بڑی کامیابی حاصل ہوئی ہے۔ دراصل علی گڑھ مسلم یونیورسٹی کو اکیڈمک رینکنگ آف ورلڈ یونیورسٹیز (اے آر ڈبلیو یو) 2020 کی رینکنگ میں شامل کیا گیا ہے۔ اس رینکنگ کو شنگھائی رینکنگ بھی کہا جاتا ہے۔
اکیڈمک رینکنگ آف ورلڈ یونیورسٹیز (اے آر ڈبلیو یو) 2020 رینکنگ میں اے ایم یو کو عالمی سطح پر801-900 بریکٹ میں رکھا گیا ہے، جبکہ ہندوستان میں ویلور انسٹی ٹیوٹ آف ٹیکنالوجی (وی آئی ٹی )کے ساتھ 8-9 مقام پر رکھا گیا ہے۔
اس کے علاوہ ہندوستان سے اس رینکنگ میں انڈین انسٹی ٹیوٹ آف سائنس (IISc)، انڈین انسٹی ٹیوٹ آف ٹیکنالوجی (IIT) مدراس ، کلکتہ یونیورسٹی ، دہلی یونیورسٹی ، IIT دہلی ، IIT کھڑگ پور ، جواہر لال نہرو یونیورسٹی (JNU) ، آل انڈیا انسٹی ٹیوٹ آف میڈیکل سائنس (ایمس) ، انا یونیورسٹی ، بھارتھیر یونیورسٹی ، IIT کانپور ، IIT روڑکی اور انڈین انسٹی ٹیوٹ آف سائنس ایجوکیشن اینڈ ریسرچ (IISER) شامل ہیں۔
امریکہ کی ہارورڈ یونیورسٹی کو اول مقام پر رکھا گیا ، جبکہ یو ایس کی اسٹینفورڈ یونیورسٹی دوسری پوزیشن پر ہے اور یونیورسٹی آف کیمبرج تیسری پوزیشن پر ہے۔ اے آر ڈبلیو یو 2020 رینکنگ میں شامل ہونے پر اے ایم یو کے وائس چانسلر پروفیسر طارق منصور نے کہا کہ اس نے تمام محاذوں پر اے ایم یو کی پیش رفت دیکھی ہے۔
انہوں نے مزید کہا کہ یہ پوری اے ایم یو برادری کے لئے بہت خوشی کی بات ہے۔ اے ایم یو کو عالمی یونیورسٹیوں کی اکیڈمک رینکنگ (اے آر ڈبلیو یو) 2020 کی اعلیٰ یونیورسٹیوں کی فہرست میں پہلی مرتبہ جگہ ملی ہے۔
