نئی دہلی :(پریس ریلیز)
جماعت اسلامی ہند کے نائب صدر پروفیسر سلیم انجینئر نے این ڈی ٹی وی کے ایگزیکٹیو ایڈیٹر اور این ڈی ٹی وی کے لکھنؤ بیورو چیف کمال خان کے انتقال پر تعزیت کا اظہار کیا ہے۔ میڈیا کو ایک بیان میں جماعت اسلامی ہند کے نائب صدر نے کہا ’ہم NDTV کے ایگزیکٹیو ایڈیٹر کمال خان کی موت پر سوگوار ہیں۔ وہ اپنی دیانت، اخلاقیات اور جرأت کے لیے مشہور تھے۔ وہ مسائل کے بارے میں بڑی بصیرت رکھتے تھے اور شاعرانہ زبان کا استعمال کرتے تھے۔ خبروں کے واقعات اور حالات حاضرہ کے بارے میں رپورٹ کرنے کا بہترین طریقہ رکھتے تھے۔ انہوں نے اپنی رپورٹنگ کے ذریعے بہت اہم مسائل کو سامنے لائے اور انتہائی حساس مسائل کو آسانی کے ساتھ پیش کیا۔ وہ صدر جمہوریہ ہند کے ذریعہ سے رام ناتھ گوئنکا ایوارڈ، اور گنیش شنکر ودیارتھی ایوارڈ حاصل کرچکے تھے۔
ان کا انتقال صحافت اور میڈیا کی دنیا کے لیے ایک بہت بڑا نقصان ہے۔ہم ان کے اہل خانہ اور چاہنے والوں سے تعزیت پیش کرتے ہیں۔اللہ تعالیٰ ان کے گناہوں کو معاف فرمائے اور جنت الفردوس میں اعلیٰ مقام عطا فرمائے۔
دریں اثناء اتر پردیش کے سینئر صحافی کمال خان کا انتقال ہو گیا ہے۔ وہ ایک بے باک، صاف گو اور ایماندار صحافی تھے۔ ان کا جانا بلا شبہ قومی صحافت کا بڑا نقصان ہے۔ آج کی ڈرامائی صحافت کے دور میں بھی وہ اپنی سنجیدہ اور صاف ستھری صحافت کے ذریعہ امتیازی حیثیت رکھتے تھے اور ملک کے چنندہ صحافیوں میں ان کا شمار ہو تا تھا۔ ایسے نازک دور میں جب صحافیوں پر منفی تبصرے ہی زیادہ ہوتے ہیں ایسے دور میں بھی قارئین اور سامعین کے دلوں میں اپنی غیر جانبدارانہ صحافت سے جن چند صحافیوں نے گھر بنایاان میں مرحوم کمال خان کا نام بھی شامل تھا۔یہ باتیں امیر شریعت بہار، اڈیشہ وجھارکھنڈ مولانا احمد ولی فیصل رحمانی سجادہ نشیں خانقاہ رحمانی مونگیر نے صحافی کمال خان کے انتقال پر اظہار تعزیت کرتے ہوئے کہیں۔انہوں نے کہا کہ آج کی چیخ پکار والی صحافت کے دور میں بغیر سنسنی پھیلائے مسائل کو صاف ستھرے انداز میں پیش کرنے کا سلیقہ کمال خان کے اندر موجود تھا۔ انہیں خوبیوں کی وجہ سے انہیں صحافتی دنیا کے بیش قیمتی رام ناتھ گوئنکا اور گنیش شنکر ودیارتھی ایوارڈز سے نوازا گیا تھا۔مولانا نے آج کے صحافیوں کو بھی ان کے جیسی تحقیقی صحافت اور تہذیبی زبان کو اپنانے کا مشورہ دیا۔
