لکھنؤ :(ایجنسی)
لکھیم پور تشدد کیس میں وزیر مملکت برائے داخلہ اجے مشرا ٹینی کے بیٹے آشیش مشرا کو ہائی کورٹ سے ضمانت مل گئی ہے۔ ہائی کورٹ کی لکھنؤ بنچ نے آشیش مشرا کو ضمانت دے دی ہے۔ اس معاملے کی سماعت پہلے ہی مکمل ہو چکی تھی۔ عدالت نے فیصلہ سناتے ہوئے اب ضمانت دے دی ہے۔ امید ہے کہ آشیش مشرا کل تک جیل سے باہر آ سکتے ہیں۔ چارج شیٹ میں ایس آئی ٹی نے کلیدی ملزم کو بتایا تھا۔
لکھیم پور تشدد کیس میں اتر پردیش ایس آئی ٹی نے حال ہی میں چارج شیٹ داخل کی تھی۔ 5000 صفحات کی چارج شیٹ میں ایس آئی ٹی نے مرکزی وزیر مملکت برائے داخلہ اجے مشرا کے بیٹے آشیش مشرا کو اہم ملزم نامزد کیا تھا۔ اتنا ہی نہیں ایس آئی ٹی کے مطابق آشیش موقع پر موجود تھا۔
ایس آئی ٹی نے اپنی جانچ میں لکھیم پور تشدد میں آشیش مشرا کے ہتھیاروں سے فائرنگ کی تصدیق کی تھی۔ آشیش مشرا کے ریوالور اور رائفل سے بھی فائرنگ کی گئی تھی۔ چارج شیٹ میں، ایس آئی ٹی نے آشیش مشرا اور انکت داس کے لائسنس یافتہ ہتھیاروں سے فائرنگ کی بات کہی ہے۔ وہیں آشیش مشرا نے کہا تھا کہ ایک سال سے ان کے ہتھیاروں سے کوئی فائر نہیں ہوا۔ پولیس نے بیلسٹک رپورٹ کی بنیاد پر فائرنگ کی تصدیق کی تھی۔
واضح رہے کہ 3 اکتوبر 2021 کو لکھیم پور کے تکونیہ میں تشدد میں 8 لوگوں کی موت ہوگئی تھی۔ الزام ہے کہ مرکزی وزیر مملکت برائے داخلہ اجے مشرا ٹینی کے بیٹے آشیش مشرا عرف مونو نے کسانوں کو اپنی جیپ سے کچل دیا ۔ اس کے بعد مشتعل ہجوم نے آشیش کے ڈرائیور سمیت چار لوگوں کو مار ڈالا تھا۔
لکھیم پور تشدد کو لے کر اپوزیشن مسلسل مرکزی حکومت کو نشانہ بنا رہی ہے۔ اپوزیشن مرکزی وزیر اجے مشرا کو کابینہ سے ہٹانے کا بھی مطالبہ کر رہی ہے۔ لیکن اب الیکشن کے درمیان میں آشیش مشرا کو ضمانت مل گئی ہے۔ ایسے میں دیکھنا یہ ہے کہ اپوزیشن اب اس معاملے کا کتنا فائدہ اٹھاتی ہے۔
