2024 کے لوک سبھا انتخابات کے CCTV فوٹیج کو ضائع کردیا گیا: الیکشن کمیشن کا کورٹ میں جواب

الیکشن کمیشن (ای سی آئی) نے دہلی ہائی کورٹ کو مطلع کیا ہے کہ دہلی کے سات ڈسٹرکٹ الیکشن افسروں (ڈی ای او) سے متعلق 2024 کے لوک سبھا انتخابات کے سی سی ٹی وی فوٹیج کو ضائع کر دیا گیا ہے۔
جسٹس منی پشکرنا نے الیکشن کمیشن کے بیان کو ریکارڈ پر لیا۔ عدالت 2024 کے لوک سبھا انتخابات کے دوران ملک بھر کے پولنگ اسٹیشنوں کے اندر سے فوٹیج مانگنے کے لیے وکیل محمود پراچہ کی طرف سے دائر درخواست کی سماعت کر رہی تھی۔کانگریس کے رکن پارلیمنٹ اور قائد حزب اختلاف راہل گاندھی نے اسے دھاندلی قرار دیتے ہوئے اسے ووٹ کی چوری سے جوڑ دیا ہے۔ راہل نے ایکس پر لکھا، "لاکھوں بی جے پی ممبران کھلے عام مختلف ریاستوں میں گھومتے ہیں اور اپنا ووٹ ڈالتے ہیں۔ اور اس چوری کو چھپانے کے لیے، تمام ثبوتوں کو تباہ کر دیا جاتا ہے۔ بی جے پی اور الیکشن کمیشن کھلے عام ووٹ چوری کرنے کے لیے ملی بھگت کر رہے ہیں۔ جمہوریت کا قتل براہ راست ہو رہا ہے۔”
اپنی درخواست میں وکیل محمود پراچا نے الیکشن باڈی کو ملک بھر کے ضلعی الیکشن افسران کو انتخابی عمل کی سی سی ٹی وی فوٹیج فراہم کرنے کی ہدایت کی تھی۔ انہوں نے یہ بھی استدعا کی کہ معاملہ عدالت میں زیر سماعت ہونے کے دوران فوٹیج کو تباہ نہ کیا جائے۔
تاہم، الیکشن کمیشن نے عدالت کو مطلع کیا کہ "آج تک، عرضی گزار کے ذریعہ مانگے گئے ڈیٹا، یعنی 2024 کے لوک سبھا انتخابات سے متعلق ویڈیو/سی سی ٹی وی فوٹیج، اب دہلی کے ضلعی انتخابی افسروں کی تحویل میں نہیں ہیں اور اسے پہلے ہی تباہ کر دیا گیا ہے۔”
ای سی آئی کی جانب سے جون میں اس طرح کی ہدایت جاری کرنے کے بعد یہ پیشرفت ہوئی ہے۔ ای سی آئی نے ریاستی انتخابی عہدیداروں کو 45 دنوں کے بعد انتخابی عمل کی سی سی ٹی وی، ویب کاسٹنگ اور ویڈیو فوٹیج کو تباہ کرنے کی ہدایت دی تھی، بشرطیکہ اس مدت کے اندر فیصلہ کو عدالتوں میں چیلنج نہ کیا گیا ہو۔ ای سی آئی نے کہا تھا کہ یہ قدم الیکٹرانک ڈیٹا کا استعمال کرتے ہوئے "بد نیتی پر مبنی بیانیہ” کو روکنے کے لیے اٹھایا گیا ہے۔
دراصل، کانگریس پارٹی کی درخواست کے جواب میں، پنجاب اور ہریانہ ہائی کورٹ نے الیکشن کمیشن کو ووٹنگ کے دن سے لے کر سی سی ٹی وی فوٹیج فراہم کرنے کی ہدایت دی تھی۔ ہائی کورٹ کی ہدایت کے بعد الیکشن کمیشن نے سی سی ٹی وی فوٹیج فراہم کرنے کے قوانین میں تبدیلی کی اور ریاستی انتخابی عہدیداروں کو 45 دنوں کے بعد سی سی ٹی وی فوٹیج، ویب کاسٹنگ اور ویڈیو فوٹیج کو تباہ کرنے کی ہدایت دی۔ بعد میں جب راہل گاندھی نے ایک پریس کانفرنس میں یہ سوال اٹھایا تو چیف الیکشن کمشنر گیانیش کمار نے جواب دیا، "ہم اپنی ماؤں، بیٹیوں اور بہنوں کی ویڈیو فوٹیج کیسے فراہم کر سکتے ہیں؟”