بیجا پو:
چھتیس گڑھ کے بیجا پور ضلع میں پولیس اور ماؤ نوازوں کے مابین ہفتہ کے روز تقریباً چار گھنٹے تک جاری رہے تصادم میں ایک دن بعد آج دن میں شہید ہونے والے جوانوں کی تعداد پانچ سے بڑھ کر 24 ہوگئی ہے اور مزید 31 جوان زخمی ہیں۔
پولیس ذرائع نے تصادم کےبعد آج موصولہ اطلاعات کے حوالے سے کہا کہ 24 جوانوں کے شہید اور 31 کے زخمی ہونے کی تصدیق ہوئی ہے، جن میں سے تقریباً ایک درجن کو علاج کے لئے راجدھانی رائے پور بھیج دیا گیا ہے۔ باقی کا یہاں کے اسپتال میں علاج چل رہا ہے۔ زخمی جوانوں میں سے کچھ کی حالت کافی سنگین ہے۔ پولیس کا خیال ہے کہ اس تصادم میں کچھ ماؤ نواز بھی ہلاک ہوئےہیں، جن کی لاشیں ماؤ نوازوں کے قبضے میں ہی ہیں۔
موصولہ اطلاعات کے مطابق جنگل میں پہاڑیوں سے گھرے علاقے میں سیکڑوں کی تعداد میں ماؤنوازوں نےمشترکہ گشتی ٹیم پر حملہ کیا۔ گشتی ٹیم میں بھی سیکڑوںجوان شامل تھے۔ بتایا گیا ہے کہ ماؤ نواز پہاڑیوں پر سے حملہ کررہے تھے۔ اس دوران آج اور زیادہ تعداد میں پولیس دستہ جائے واقعہ کی جانب روانہ کیا گیا ہے۔
ذرائع کا کہنا ہے کہ تصادم کا مقام یہاں سے تقریباً 75 کلو میٹر دور ہےتصادم کل دن میں تقریباً دو بجے شروع ہوا تھا اور دیر شام تک جاری رہا ۔ پہاڑیوں سے گھرے علاقے میں کل دیر رات تک پانچ جوانوں کے شہید ہونے کی سینئر افسر نے تصدیق کی تھی۔ زخمیوں میں سے 12 جوانوں کو کل دیر شام ہی ہیلی کاپٹر سے رائے پور بھیج دیا گیا تھا۔
پولیس کا کہنا ہے کہ یہ تصادم بیجا پور اور سکما ضلع کی سرحد پر ترریم علاقے کے جنگلوں میں ہوا۔ بتایا گیا ہےکہ یہاں پر کچھ دنوں سے ماؤنوازوں اور ان کے لیڈروں کے یکجا ہونےکی اطلاع پر گشتی ٹیم بھیجی گئی تھی۔ گشتی ٹیم میں سیکڑوں جوان شامل تھے۔
دوسری جانب وزیر داخلہ امت شاہ نے آج وزیر اعلیٰ بھوپش بگھیل سے فون پر گذشتہ روز ہوئے بیجا پور ماؤنوازوں کے حملے کے بارے میں معلومات حاصل کیں اور ریاستی حکومت کو مرکز کی جانب سے ہر قسم کی مدد کی یقین دہانی کرائی۔ سرکاری ذرائع نے بتایا کہ مسٹر بگھیل نے وزیر داخلہ کو بیجا پور میں ریاست اور مرکز کے حفاظتی دستوں اور ماؤ نوازوں کے مابین تصادم کی میدانی صورتحال سے واقف کرایا۔ انہوں نے فوجیوں کی شہادت پر افسوس کا اظہار کرتے ہوئے کہا کہ سلامتی افواج کے حوصلے بلند ہیں اور ماؤ نواز تشدد کے خلاف یہ لڑائی ہم جیتیں گے۔
مسٹر شاہ نے وزیر اعلی کو بتایا کہ مرکزی حکومت اور ریاستی حکومت مل کر یہ لڑائی جیتیں گے ۔انہوں نے کہا کہ مرکزی حکومت کی طرف سے جو بھی ضروری مدد ہوگی وہ ریاستی حکومت کو دی جائے گی۔انہوں نے سی آر پی ایف کے ڈائریکٹر جنرل کو جائے واقعہ کا دورہ کرنے کی ہدایت بھی کی۔ مسٹر بگھیل نے کہا کہ ماؤ نواز تشدد سے متاثرہ علاقوں میں جاری ترقیاتی کام سے گاؤں کے لوگوں کا ماؤ نوازوں کی جانب رجحان ختم ہورہا ہے اور وہ مسلسل ترقی کے مرکزی دھارے میں شامل ہورہے ہیں۔ صحت، تعلیم اور دیگر سہولیات اندرونی گاؤں تک قابل رسائی بن رہی ہیں اور ماؤ نواز نظریے سے لوگ دور ہورہے ہیں ۔جس سے بوکھلاکر ماؤ نواز اس طرح کے حملے کرکے اپنی موجودگی درج کرانے کی کوشش کر رہے ہیں۔
