نئی دہلی : (پریس ریلیز)
امارت شرعیہ ہند کی مجلس شوری کا ایک روزہ اجلاس امیر الہند مولانا سید ارشد مدنی کے زیر صدارت آج مفتی کفایت اللہ میٹنگ ہال واقع صدر دفتر جمعیۃ علماء ہند نئی دہلی میں منعقد ہوا،جس میں ملک بھر سے امارت کے ارکان شوری اور امرائے شریعت شریک ہوئے، اجلاس میں معاشرے میں دینی بیداری اورعائلی معاملات کو دین کی روشنی میں حل کرنے کی ترغیب اور محاکم شرعیہ کے نظام کی توسیع وغیرہ پر تفصیل سے بحث و گفتگو ہوئی۔اس موقع پر نائب امیر الہند مفتی سید محمد سلمان منصورپوری نے سابقہ کارروائی کی خواندگی کی اور زیر بحث موضوعات کا تعار ف پیش کیا۔ سب سے پہلے امیر الہند رابع حضرت مولانا قاری سید محمد عثمان صاحب منصورپوری ؒکی خدمات کو سراہتے ہوئے ان وفات پر تجویز تعزیت پیش کی گئی۔
امیر الہند مولانا سید ارشد مدنی نے اپنے خطاب میں ملت اسلامیہ میں دینی بیداری اور اس سے متعلق شعو ر وآگاہی کے لیے عوامی بیداری پر زور دیا اور کہا کہ ائمہ مساجد اور علمائے کرام جمعہ کے بیانات میں اس کو موضوع کو بنا کر باقاعدہ عوام کی ذہن سازی کریں کہ مسلمان اپنے مسائل شریعت مطہرہ کی روشنی میں حل کریں، اس سے وہ بہت سی الجھنوں اور مالی اخراجات سے بچ سکتے ہیں۔
مجلس شوری نے اس موقع پر یہ طے کیا کہ دو تین مہینوں میں جب حالات سازگار ہو جائیں تو امارت شرعیہ کی اہمیت و ضرورت اجا گر کرنے کے لیے ملک کی راجدھانی دہلی میں ملکی سطح کا ایک بڑا اجتماع منعقد کیا جائے، اس اجتماع میں پورے ملک میں جتنے بھی محاکم شرعیہ چل رہے ہیں، ان کے ذمہ داروں کو بھی دعوت دی جائے۔اجلاس میں یہ بھی طے کیا گیا کہ جن صوبوں میں ابھی تک امیر شریعت کا انتخاب نہیں ہوا ہے، وہاں جلد ازجلد کارروائی مکمل کی جائے۔اسی طرح امارت شرعیہ ہند کے سابق ناظم مولانا معزالدین احمد ؒ کی جگہ ان کے برادر خورد مولانا مفتی اسعد الدین کو امارت شرعیہ ہند کا نیا ناظم مقر کیا گیا۔
اجلاس مجلس شوری نے اپنے محاکم شرعیہ کو یہ بھی ہدایت دی ہے کہ محکمہ شرعیہ کا کام معروضی طور پر مصالحتی انداز میں کیا جائے، حاکمانہ طرزعمل اختیار کرنے سے گریز کیا جائے۔ایک اہم فیصلے میں یہ طے ہوا کہ مرکزی دفتر امارت شرعیہ ہند میں باضابطہ ایک دارالافتاء کا قیام عمل میں لا یا جائے جہاں سے تحریری فتاوی صادر ہوں۔اجلاس میں مولانا عبدالعلیم فاروقی نے بحیثیت امیر شریعت اترپردیش، مولانا اشفاق اعظمی کو یوپی کا نائب امیر شریعت نامزد کیا۔
اجلاس میں امیر الہند کے علاوہ مفتی ابوالقاسم نعمانی ، مولانا محمود مدنی، مولانا مفتی سید محمد سلمان منصورپوری، مولانا عبدالعلیم فاروقی، مولانا رحمت اللہ کشمیری، مولانا مفتی اشفاق احمد اعظمی، مولانا عبدالرب اعظمی،مولانا عبداللہ ناصر ، مولانا سید ازہر مدنی، مولانا حکیم الدین قاسمی ، مولانا مفتی احمد دیولہ گجرات، مولانا ابوالحسن یعقوب ، مولانا زین العابدین ، مولانا افتخار کرناٹک،مولانا محمد اسحق امیر شریعت ہریانہ،پنچاب وہماچل، مولانا حلیم اللہ مہاراشٹرا، مولانا معصوم ثاقب ، مولانا حکیم الدین قاسمی، مولانا مفتی سید محمد عفان منصورپوری ، مولانا بدراحمد مجتبیٰ ، مولانا صدیق اللہ چودھری، مولانا قاری محمد امین، مولانا محمد یحییٰ آسام شریک تھے۔
