نئی دہلی :(ایجنسی)
دہلی میں کورونا اور اومیکران کے تیزی سے بڑھتے معاملات کے درمیان آج دہلی ڈیزاسٹر مینجمنٹ اتھاریٹی (DDMA) کی میٹنگ ہوئی ۔ ذرائع کے مطابق میٹنگ میں فیصلہ کیا گیا ہے کہ فی الحال دہلی میں لاک ڈاؤن نہیں لگے گا، لیکن کچھ پابندیاں لگائی جاسکتی ہیں۔ ذرائع کے مطابق راجدھانی میں کورونا وائرس کے بڑھتے معاملات کے درمیان ریستوراں کی ڈائن ان سروسیز بند ہوسکتی ہیں، حالانکہ ٹیک اوے خدمات جاری رہیں گی ۔ اس کے علاوہ ہفتہ وار مارکیٹ کو لے کر بھی سخت قدم اٹھائے جاسکتے ہیں ۔
وہیں ڈی ڈی ایم اے نے راجدھانی میں کورونا پروٹوکول پر مزید سختی کے ساتھ عمل کرانے کی ہدایت دی ہے ۔ اس کے ساتھ ہی قوانین کی خلاف ورزی کرنے والوں کے خلاف کارروائی کی بات کہی ہے ۔ نیز این سی آر کی سرکاروں سے بھی دہلی کے مساوی پابندیاں عائد کرنے کی اپیل کی گئی ہے ۔ اس کے علاوہ مہاجر مزدوروں کی نوکری کے تحفظ کو یقینی بنانے کی بھی بات کہی گئی ہے ۔
خیال رہے کہ اس سے پہلے اتوار کو وزیر اعلیٰ اروند کیجریوال نے کہا تھا کہ ابھی ہمارا دہلی میں لاک ڈاؤن لگانے کا کوئی ارادہ نہیں ہے ۔ وہیں انہوں نے لوگوں سے ماسک پہننے کی اپیل کی تھی ۔
قابل ذکر ہے کہ دہلی میں کورونا پر قابو پانے کیلئے پہلے سے ہی کئی پابندیاں لگائی جاچکی ہیں۔ راجدھانی میں نائٹ کرفیو کے ساتھ ویک اینڈ کرفیو جاری ہے تو ویک اینڈ کو چھوڑ کر ڈی ٹی سی بسیں اور دہلی میٹرو 50 فیصدی صلاحیت کے ساتھ چل رہی ہیں ۔ اس کے علاوہ ماسک نہ پہننے اور سماجی فاصلہ پر عمل نہیں کرنے والوں کے بھی چالان کاٹے جارہے ہیں ۔
بتادیں کہ ملک کی راجدھانی دہلی میں اتوار کو کورونا کے 22751 نئے معاملات سامنے آئے تھے جبکہ پازیٹیویٹی شرح 23.53 فیصد رہی تھی ۔ وہیں گزشتہ 24 گھنٹے میں 17 لوگوں کی موت ہوئی ہے جوکہ اس سال اب تک سب زیادہ ہے ۔
