لکھنؤ:(ایجنسی)
اترپردیش کے آئندہ اسمبلی انتخابات میں عام آدمی پارٹی اور سماج وادی پارٹی کے درمیان اتحاد کی قیاس آرائیاں ختم ہوتی نظر آ رہی ہیں۔ خبر ہے کہ اروند کیجریوال کی پارٹی یوپی الیکشن میں تنہا اترنے کی تیاری کر رہی ہے۔ درحقیقت، ’آپ ‘ایم پی سنجے سنگھ نے 24 نومبر کو لکھنؤ میں ایس پی سربراہ اکھلیش یادو سے ملاقات کی تھی، جس کے بعد دونوں پارٹیوں کے درمیان قبل از انتخابات اتحاد کی قیاس آرائیاں تیز ہوگئیں۔ تاہم اب میڈیا رپورٹس کے مطابق پارٹی سے وابستہ ذرائع نے اشارہ دیا ہے کہ سیٹوں کی تقسیم کے حوالے سے دونوں پارٹیوں کے درمیان بات چیت اٹک گئی ہے اور ’آپ ‘جس نے یوپی انتخابات کے لیے 150 سیٹوں پر امیدواروں کا اعلان کرچکی آپ ایک ہفتہ کے اندر تقریباً 100 ناموں کی دوسری فہرست بھی جاری کرسکتی ہے ۔
انگریزی اخبار ٹائمز آف انڈیا کی رپورٹ کے مطابق آپ کے ریاستی ترجمان ویبھو مہیشوری نے کہا کہ پہلے سے کیے گئے اعلان کے مطابق پارٹی اب ریاست کی تمام سیٹوں پر الیکشن لڑنے کی تیاری کر رہی ہے۔ انہوں نے کہا، ‘ہم تقریباً ایک ہفتے میں تقریباً 100 امیدواروں کی فہرست جاری کریں گے اور اس کے بعد جلد ہی امیدواروں کی دوسری فہرست بھی جاری کی جائے گی۔ اس کے ساتھ دسمبر کے آخر تک کم از کم 350-400 امیدواروں کے ناموں کا باضابطہ اعلان کیا جا سکتا ہے۔
