نوئیڈا:قرآن اور مسلمانوں پر اشتعال انگیز ریمارکس، کاغذ پر قرآن لکھ کر جلانے کی کوشش،پولیس نے دبوچا

اترپردیش کے نوئیڈا سے ایک دل دہلا دینے والا واقعہ سامنے آیا ہے جس میں ایک شخص نے ایک ہاتھ سے کاغذ پر قرآن لکھ کر اسے جلا دیا اور اس کی توہین کرنے کی کوشش کی۔ یہی نہیں ویڈیو میں وہ قرآن اور مسلمانوں کے بارے میں اشتعال انگیز ریمارکس کرتے ہوئے بھی نظر آرہا ہے۔ یہ شخص نوئیڈا کا رہنے والا ہے اور اس کا نام دیو گرجر بتایا گیا ہے۔ فی الحال پولیس نے اسے اپنی تحویل میں لے لیا ہے۔
ویڈیو میں اس شخص کو کاغذ کا ایک ٹکڑا پکڑے دیکھا جا رہا ہے جس پر ہاتھ سے قرآن لکھا ہوا ہے۔ وہ ایک کاغذ کے ٹکڑے سے قرآن کی آیات کا مفہوم بیان کرتے ہوئے اور اشتعال انگیز تبصرے کرتے نظر آتا ہے۔ ویڈیو میں وہ شخص کہتا ہے کہ میں قرآن پڑھ کر بتاؤں گا کہ ان لوگوں نے ہندوؤں کے بارے میں کیا لکھا ہے۔ وہ کہتا ہے قرآن میں فرمایا گیا ہے جب حرمت والے مہینے گزر جائیں تو کافروں کو جہاں پاؤ قتل کرو، پکڑو اور ہر وقت ان کی تاک میں رہو۔ اگر کافر اسلام قبول کر کے نماز پڑھنے لگیں تو انہیں جانے دو۔ اس کے بعد وہ اس کاغذ کو جلاتے ہوئے اور اسے لات مارتے ہوئے نظر آتا ہے۔اطلاع کے مطابق تھانہ بدل پور پولیس نے ملزم کو حراست میں لے لیا ہے اور مقدمہ درج کر کے مزید کارروائی کی جا رہی ہے۔ واضح رہے یہ معاملہ ایسے وقت میں سامنے آیا ہے جب جموں و کشمیر کے پہلگام میں دہشت گردانہ حملے کے بعد ہندوستان اور پاکستان کے درمیان تناؤ ہے۔ (دینک ہندوستان کے ان پٹ کے ساتھ)