نئی دہلی:(ایجنسی)
ملک میں کورونا وائرس کے نئے ویرینٹ اومیکرون کے معاملوں میں تیزی کے ساتھ اضافہ ہو رہا ہے۔ مرکزی وزارت صحت نے آج کہا ہے کہ ملک بھر میں اب تک اومیکرون کے 200 معاملے درج کئے جا چکے ہیں۔ یہ معاملے ملک کی 12 ریاستوں میں تصدیق کی گئی ہے۔ بیشتر کیسز مہاراشٹر اور دہلی میں درج کئے گئے ہیں۔ راحت کی بات یہ ہے کہ 200 میں سے 77 مریض شفایابی حاصل کر چکے ہیں۔واضح رہے کہ ہر 4 کیسز میں سے ایک کیس دہلی سے آرہا ہے ۔
اومیکرون کے تیزی سے پھیلاؤ نے ہندوستان میں کورونا کی تیسری لہر کا خطرہ پیدا کر دیا ہے۔ ماہرین کا کہنا ہے کہ جنوری کے بعد ملک میں کورونا کے معاملوں میں تیزی سے اضافہ ہو سکتا ہے۔ دریں اثنا، حکومت ویکسین کی تاثیر کا جائزہ لینے میں مصروف ہے۔
ملک میں درج کئے جانے والے کل 200 کیسز میں سے مہاراشٹر میں 54، دہلی میں 54، تلنگانہ میں 20، کرناٹک میں 19، راجستھان میں 18، کیرالہ میں 15، گجرات میں 14 معاملے رپورٹ ہوئے ہیں۔ وہیں، اتر پردیش میں 2 اور آندھرا پردیش، چنڈی گڑھ، تمل ناڈو اور مغربی بنگال میں ایک ایک کیس درج کیا گیا ہے۔وزارت صحت کے مطابق ملک کی ریاستوںمیں اب تک اومیکرون پہنچ چکاہے ۔
دریں اثناء بھوپال میں کورونا انفیکشن کے دس نئے معاملے سامنے آئے ہیں۔چیف میڈیکل اور ہیلتھ افسر کے مطابق کل 4122 نمونوں کی جانچ میں دس افراد متاثرپائے گئے۔اب زیر علاج معاملے 65 ہیں، جن میں سے 32 کا اسپتالوں میں اور 33 کا ہوم آئسولیشن میں علاج چل رہا ہے۔اب تک ضلع میں 1,23,841 افراد متاثر ہوچکےہیں اور ان میں سے 1,22,772 افراد انفیکشن کو ہرانےمیں کامیاب رہے۔وہیں 20 لاکھ 75 ہزار سے زیادہ کو کورونا ویکسین کا پہلا اور 18 لاکھ 29 ہزار کو دوسرا ٹیکہ بھی دیا جا چکا ہے۔
وہیں، ملک بھر میں گزشتہ 24 گھنٹوں کے دوران کورونا کے 5,326 نئے کیسز درج ہوئے ہیں، جوکہ گزشتہ 581 دنوں میں نئے کیسز کی سب سے کم تعداد ہے۔ کورونا سے صحت یاب ہونے والوں کی بات کریں تو اس دوران 8 ہزار 43 افراد کورونا کو شکست دے چکے ہیں جس کے بعد کورونا سے شفایاب ہونے والے افراد کی مجموعی تعداد 3 کروڑ 41 لاکھ 95 ہزار 60 ہوگئی ہے۔
ہندوستان میں کورونا سے شفایابی کی شرح فی الحال 98.40 فیصد ہے، جو مارچ 2020 کے بعد سب سے زیادہ ہے۔ ساتھ ہی فعال کیسز کی بات کریں تو ملک میں اس وقت 79097 لوگ زیر علاج ہیں، یہ تعداد 574 دنوں میں سب سے کم ہے۔
