نئی دہلی : (ایجنسی)
لوک سبھا رکن پارلیمنٹ اور اے آئی ایم آئی ایم کے سربراہ اسد الدین اویسی نے لوک سبھا اسپیکر اوم برلا کو ایک خط لکھا ہے جس میں سیکورٹی کا مطالبہ کیا گیا ہے۔ انہوں نے لکھا کہ دہلی میں ان کے بنگلے پر توڑ پھوڑ کے بعد ان کی سیکورٹی کو خطرہہے۔ ایسی صورتحال میں انہیں سیکورٹی فراہم کی جانی چاہیے۔ نیز گھر میں توڑ پھوڑ کی جانچ پارلیمنٹ کی استحقاق کمیٹی کو دی جائے۔
واضح رہے کہ منگل کو ہندو سینا کے کارکنوں نےاویسی کے 24-اشوک روڈ ، نئی دہلی واقع رہائش گاہ کے باہر مظاہرہ کیا تھااور اس کے بعد توڑ پھوڑ کی گئی۔ مظاہرین نے اویسی کے گھر کےباہر لگی نیم پلیٹ، لیمپ اور کھڑکی کا شیشہ بھی توڑ دیا تھا ، جس وقت یہ حملہ ہوا اس وقت اویسی گھر پر موجود نہیں تھے۔ توڑ پھوڑ کی اطلاع کے بعدپولیس نے پانچ لوگوں کو حراست میں لیا تھا ۔
اویسی نے خط میں الزام لگایا کہ جو لوگ ان کے گھر پر حملہ کرنے آئے تھے وہ تیز دھار ہتھیاروں سے لیس تھے۔ انہوں نے بتایا کہ مظاہرین کلہاڑی ، لاٹھی جیسے ہتھیاروں کے ساتھ ان کے بنگلے پر پہنچے تھے۔ اس دوران پتھراؤ کیا گیا اور گھر میں نصب نیمپلیٹ کو بھی توڑ دیاگیا۔ انہوں نے الزام لگایا کہ پولیس نے اس معاملے میں صرف پانچ افراد کو گرفتار کیا ہے حالانکہ کم از کم 13 لوگ وہاں موجود تھے۔
اویسی نے الزام لگایا کہ حملہ آور ان کے بنگلے میں داخل ہوئے اور وہاں موجود کیئر ٹیکر راجو لال کو بری طرح مارا پیٹا۔ یہاں تک کہ مجھے جان سے مارنے کی دھمکی دی گئی۔ انہوں نے مطالبہ کیا کہ اس معاملے کو سنجیدگی سے لیتے ہوئے ان کی سیکورٹی انتظامات کو مضبوط کیا جائے۔
