نئی دہلی:(پریس ریلیز)
سنٹرل کونسل فار ریسرچ اِن یونانی میڈیسن (سی سی آر یو ایم)، وزارت آیوش، حکومت ہند کے زیر اہتمام کووڈ۔19وبا:تجربات اور اسباق کے موضوع پرمنعقدویبینار سیریزبحسن و خوبی اختتام پذیر ہوگئی۔ویبینار سیریز کے ذیلی عناوین ”کووڈ۔19وباکے دوران کی سیکھ“، ”صحت کو برقرار رکھنے میں غذا کا کردار“، ”کووڈ۔19مریضوں کاعلاج: تجربہ کا اشتراک‘‘، ”کووڈ۔19 کے دوران اور اس کے بعد دماغی صحت کی دیکھ بھال“ اور ”کووڈ کے بعد کی پیچیدگیاں اور دیکھ بھال“ پر15، 16، 17، 20 اور 21 دسمبر 2021 کو پانچ ویبینار منعقد کئے گئے۔
ویبینار سیریز کا افتتاح پروفیسر (ڈاکٹر) افشار عالم، وائس چانسلر، جامعہ ہمدرد، نئی دہلی نے کیاتھا۔ اپنے افتتاحی خطاب میں پروفیسر عالم نے کہا کہ جسم کے مدافعتی نظام کی تقویت و اصلاح آیوش سسٹم کی اہم خوبیوں میں سے ہے اور یہ کووڈ۔19 وبا کے خلاف جنگ میں بہت اہم ثابت ہوئی ہے۔ انہوں نے مزید کہا کہ جیسے ہی کووڈ۔19کی وبا پھیلی صحتی نظام تنگ پڑ گیا اور ایسے میں آیوش سسٹم نے جسم کے مدافعتی نظام کی تقویت کی تدابیر کے ذریعہ اہم کردار ادا کیا کیونکہ بیماریوں سے بچنے کے لئے مدافعتی نظا م کو مضبوط کرنا ضروری ہے۔
اختتامی ویبینار سے خطاب کرتے ہوئے پروفیسر عاصم علی خان، ڈائرکٹر جنرل،سی سی آر یو ایم اورایڈوائزر (یونانی)، وزارت آیوش، حکومت ہند نے کووڈ۔19 کے خلاف جنگ میں مدافعتی نظام کی اہمیت پر روشنی ڈالی۔انہوں نے قوت مدافعت میں اضافہ کے حوالے سے غذا کی اہمیت واضح کی اور کہا کہ سی سی آر یوایم نے کووڈ۔19 کے دوران قوت مدافعت میں اضافہ کے لیے یونانی ادویات پر مبنی غذا اور طرز زندگی کے رہنما اصول کی سفارش کی۔
پروفیسر خان نے کووڈ۔19 کے بعد کی پیچیدگیوں اور وبا سے متعلق دماغی صحت کے عوارض سے نمٹنے کے لیے یونانی میڈیسن کی صلاحیتوں اور امکانات پر تفصیلی گفتگو کی اور دماغی صحت کے تحفظ کے لیے اسباب ستہ ضروریہ (چھ ضروری عوامل) کی اہمیت پر زور دیا۔انہوں نے ویبینار سریز سے خطاب کرنے والے ماہرین، شرکاء اور آرگنائزنگ ٹیم کی تعریف کا شکریہ ادا کیا اور کلمات تحسین کہے۔
سیریز کے پانچویں ویبینار سے خطاب کرتے ہوئے ڈاکٹر سنتوش کمار، ایسوسی ایٹ پروفیسر، ایمس، رشیکیش اور پروفیسر امام الدین احمد، سابق پرنسپل، گورنمنٹ یونانی میڈیکل کالج، چنئی نے کووڈ۔19کے بعد کی پیچیدگیوں کے بارے میں تفصیلی گفتگو کی اورایلوپیتھک و یونانی میڈیسن میں اس کے علاج پر تبادلہ خیال کیا۔
ویبنار کے ماڈریٹرڈاکٹر ایم اے قاسمی، جوائنٹ ایڈوائزر (یونانی)، وزارت آیوش، حکومت ہند نے ویبینارکی کاروائی کا خلاصہ پیش کیا اور اپنے خیالات کا اظہار کیا۔
سیریز کے باقی ویبینار میں ڈاکٹر ارم ایس راؤ، پروفیسر، دہلی یونیورسٹی، پروفیسر محمد انور، علی گڑھ مسلم یونیورسٹی، علی گڑھ، ڈاکٹر روہت کمار، صفدر جنگ اسپتال، نئی دہلی، ڈاکٹر افتخار حسین غازی، کشمیر طبیہ کالج، جموں و کشمیر، ڈاکٹر دنیش کٹاریہ، لیڈی ہارڈنگ میڈیکل کالج، نئی دہلی،پروفیسر محمد ادریس، دہلی یونیورسٹی، ڈاکٹر جگل کشور، پروفیسر، صفدر جنگ اسپتال، نئی دہلی اور ڈاکٹر آر کے منچندا، ڈائریکٹر، ڈائریکٹوریٹ آف آیوش، حکومت دہلی کلیدی مقرر تھے۔ پدم شری ڈاکٹر ایم اے وحید، سابق ڈائریکٹر، این آر آئی یو ایم ایس ڈی، حیدرآباد، پروفیسر عبدالودود، ڈائریکٹر، نیشنل انسٹی ٹیوٹ آف یونانی میڈیسن، بنگلورو، پروفیسر ایم اے جعفری اور ڈاکٹر ایس ایم عارف زیدی، جامعہ ہمدرد، نئی دہلی ماڈریٹر کی حیثیت سے شریک ہوئے اور اپنے خیالات اور تجربات کا اشتراک کیا۔
ڈاکٹر غزالہ جاوید، ریسرچ آفیسر (یونانی) سائنٹسٹ-IV، ڈاکٹر فرح احمد، ریسرچ آفیسر (یونانی) اور محمد نیاز احمد، ریسرچ آفیسر (پبلیکیشن)، سی سی آریوایم نے ویبینار سیریزکے انتظام و انصرام کی ذمہ داری نبھائی۔ڈاکٹر ناہید پروین، اسسٹنٹ ڈائریکٹر (یونانی) اور کے کے سپرا، اسسٹنٹ ڈائریکٹر (ایڈمنسٹریشن)، سی سی آر یو ایم نے تکنیکی اور انتظامی تعاون فراہم کیا۔
ویبینار سیریز میں تعلیمی و تحقیقی اداروں کے محققین، طلبا ء و ماہرین تعلیم نے بڑی تعداد میں شرکت کی۔ کووڈ۔19وبا سے متعلق احتیاطی،تحفظی اور معالجاتی تدابیرپر گفتگوکرنے کیلئے یہ ویبینار ایک اہم پلیٹ فارم ثابت ہوئی۔
