لکھنؤ: (ایجنسی)
اترپردیش کے وزیر اعلیٰ یوگی آدتیہ ناتھ کی امیج کو بہتر بنانے کے لیے آج اخبار میں ایک فل پیج کوور اشتہار شائع ہو اہے ، جس نے ترنمول کانگریس کو بےحد خوش کردیا ہے۔ دراصل اشتہار میں ترقی کے مترادف کے طور پر جو تصویر شائع ہوئی ہے ، وہ کولکاتا کے ایک فلائی اوور کی ہے، جس پر پیلی ٹیکسی بھی جاتی ہوئی نظر آ رہی ہے ۔ مغربی بنگال کی حکمراں جماعت ترنمول کانگریس نے اسے انتخاب جیتنے کے لیے بنگال سرکارکے کاموں کو اپنے کام کے طور پر کریڈیٹ لینے کا بی جے پی پر الزام لگایا ہے ۔
اتر پردیش حکومت کی طرف سے جاری کردہ اشتہار میں یوگی آدتیہ ناتھ کی حکومت کی طرف سے ریاست میں گزشتہ پانچ سالوں میں کئے گئے ترقیاتی کاموں کو دکھایا گیا ہے ، جسے اکثر ملک میں سب سے کم ترقی یافتہ میں سے ایک ریاست کے طور پر دیکھاجاتا ہے ، لیکن یوگی کے ڈیولپمنٹ ماڈل کو اجاگر کرنے والی تصاویر نےپارٹی کو تنازع میں ڈال دیا ہے ۔
اشتہار میں دئے گئے کولاج کے ایک حصہ میں کولکاتا کی تصویر جھلکتی ہے ، جس میں ایک فلائی اوور جس پر نیلی -سفید پینٹ کاٹریک مارک ہے اس پر پیلی ٹیکسیاں دوڑ رہی ہیں کئی سوشل میڈیا یوزر نے فلائی اوور کی شناخت ممتا بنرجی کی سرکار کے ذریعہ بنائے گئے وسطی کولکاتا میں ’ ماں فلائی اوور‘ کے طور پر کی ہے ۔
سوشل میڈیا صارفین نے اشتہار میں اسی فلائی اوور کے ایک طرف دو اونچی عمارتوں کی شناخت ایک فائیو اسٹار ہوٹل چین کے طور پر کی ہے ۔ حال ہی میں اختتام پذیر بنگال اسمبلی انتخابات میں بی جے پی کو شکست دینے والی ترنمول کانگریس کے رہنماؤں ،کارکنوں اور حامیوں نے ٹویٹ کرکےاس اشتہار کے لیے بی جے پی اور اترپردیش کے وزیر اعلیٰ کامذاق اڑایا ہے ۔
ترنمول کے سینئر لیڈر اور وزیر اعلیٰ ممتا بنرجی کے بھتیجے ابھیشیک بنرجی نے ٹویٹر پر ایک سخت تبصرہ کیا ہے۔ انہوں نے لکھا ، ’یوگی آدتیہ ناتھ کے لیے یو پی کی ترقی کا مطلب ہے کہ ممتا بنرجی کی قیادت میں بنگال میں انفراسٹرکچر کی ترقیاتی کاموں کی تصاویر چوری کرنا اور انہیں اپنا کہہ کر استعمال کرنا! ایسا لگتاہے کہ بی جے پی ’ڈبل انجن ماڈل‘ سب سے مضبوط ریاست میں بری طرح سے ناکام ہگئی ہے اور وہ اب عوامی طور پر اجاگر ہوگیا ہے ۔
بتادیں کہ اترپردیش میں اگلے سال کی شروعات میں اسمبلی انتخابات ہونے والے ہیں اور بی جے پی دوسری بار اقتدار میں آنے کی امید کررہی ہے لیکن ریاست کے لیڈروں کے ایک طبقہ میں یہ خدشہ ہے کہ کووڈ کی دوسری لہر سے نمٹنے میں وزیر اعلیٰ کی شبیہ خراب ہو ئی ہے ۔ دیہی علاقوں میں آکسیجن کابحران اور بنیادی طبی سہولت کی کمی کی خبروں کے درمیان گنگا ندی کے ریت کے کنارے دبی ہزاروں لاش اور اس میں تیرتی لاشوں نے دنیا بھر میں سرخیاں بٹوری تھیں۔
