پریاگ راج: (ایجنسی)
پریاگ راج میں تجاوزات ہٹانے سے متعلق الہ آباد ہائی کورٹ کے حکم پر عمل درآمد شروع ہو گیا ہے۔ انتظامیہ کے ذریعہ آزاد پارک میں موجود مسجد، مزار ،مندر سمیت کئی غیر قانونی ڈھانچوں کو منہدم کیا گیا ۔
آج تک ہندی پورٹل کے مطابق ہائی کورٹ کے سخت موقف کے بعد امر شہید چندر شیکھر آزاد پارک کے اندر بنے مسجد، 14 مقبرے اور تین مندروں سمیت تقریباً تین درجن مذہبی تجاوزات کو ہٹایاگیاہے ۔ یہ کارروائی دیر رات (ہفتہ ) تک چلتی رہی، یہاں سے ملبہ ہٹا کر پودھے لگائے دئے گئے ہیں ۔
بتا دیں کہ ہائی کورٹ نے پریاگ راج واقع چندر شیکھر آزاد پارک میں 1975 کے بعد ہوئے غیر قانونی تعمیرات ہٹانے کا حکم دیا تھا ۔ کورٹ نے اس کی کارروائی سے متعلق حکومت کی رپورٹ پر عدم اطمینان کااظہار کیا تھا اور تلخ تبصرہ کیا تھا ۔
اس سال جولائی میں الٰہ آباد ہائی کورٹ میں پریاگ راج ضلع کے مشہور چندر شیکھر آزاد پارک سے مذہبی تجاوزات کو ہٹانے کی مانگ کرتے ہوئے عرضی گزار جتندر سنگھ کی جانب سے داخل کی گئی تھی ۔ اس معاملے میں سماعت کرتے ہوئے کورٹ نے سنی سینٹرل وقف بورڈ اور ریاستی سرکار سمیت تمام مدعا علیہان کو نوٹس جاری کیا تھا ۔
الہ آباد ہائی کورٹ نے کہا تھا کہ اس طرح کا حکم 1987 میں غیر قانونی تجاوزات کو لےکرمنظور کیا گیا تھا ۔ کورٹ نے پوچھا کہ اس حکم کو لاگو کیوں نہیں کیا گیا؟ بہرحال اب انتظامیہ نے پارک میں 1975 کےبعد بنائے گئے تمام غیر قانونی تعمیرات کو منہدم کردیاہے ۔
