لکھنؤ : (ایجنسی)
صدر جمہوریہ ہند کا چار روزہ دورہ آج سے شروع ہوگیا ہے ۔ گزشتہ تین مہینے میں یہ ان کا دوسرادورہ ہے۔ اس سے پہلے وہ جون میں آئے تھے اور اپنے آبائی شہر کانپوراور راجدھانی لکھنؤ بھی گئے تھے۔ ان کی آمد پر انتظامیہ کی جانب سے بڑے سطح پر تیاریاں کی گئی ہیں، لیکن ایس پی کے لیڈر پون پانڈے نے ان تیاریوں پر سوال اٹھائے ہیں۔ انہوں نے کہاکہ بی جے پی صدرجمہوریہ کےدورے پر سیاست کررہی ہے ۔
پانڈے نے کہا کہ میں یہ واضح کرنا چاہتا ہوں کہ صدر جہاں جانا چاہیں جا سکتے ہیں لیکن بی جے پی اس سے سیاسی فائدے اٹھانے کی کوشش کررہی ہے ۔
’ستیہ ہندی‘ کے مطابق اکھلیش یادو کے قریبی مانے جانے والے پانڈے نے کہاکہ مجھے یہ کہنے میں کوئی ہچکچاہٹ نہیں ہے کہ یہ ہندوستان کے صدر کا دورہ ہے بلکہ ایسا لگتا ہے کہ بی جے پی کے کسی بڑے لیڈر کا دورہ ہے ۔
پون پانڈے وہی لیڈر ہیں جنہوں نے چند ماہ قبل عام آدمی پارٹی کے رکن پارلیمنٹ سنجے سنگھ کے ساتھ رام مندر کی تعمیر کے لیے زمین کی خریداری میں مبینہ گھپلے کا معاملہ اٹھایا تھا۔ وہ اکھلیش یادو کی حکومت میں وزیر بھی رہ چکے ہیں۔
