قاری سید عثمان منصورپوری کی کورونا رپورٹ آئی مثبت، دعائے صحت کی اپیل

دیوبند:دارالعلوم دیوبند کے کارگزار مہتمم اور جمعیۃ علماء ہند کے قومی صدر امیر الہند مولانا قاری سید محمد عثمان منصورپوری کی کورونا رپورٹ پوزیٹو آئی ہے ۔کورونا رپورٹ مثبت آنے کے بعد مولانا قاری سید عثمان منصورپوری نے اپنے آپ کو ہوم کوارنٹائن کر لیا ہے جہاں ڈاکٹر ان کا علاج کر رہے ہیں ۔ یہ اطلاع جمعرات کے روز ان کے صاحبزادہ اور نامور نوجوان عالم دین مولانا قاری سید عفان منصورپوری نے دی ہے ۔انہوںنے سبھی لوگوں سے مولانا قاری سید عثمان منصورپوری کے لئے دعائے صحت کی اپیل کی ہے ۔ قاری عفان منصورپوری نے بتایا کہ ان کے والدِ محترم کی طبیعت کئی دنوں سے ناساز چل رہی تھی انہیں نزلہ اور زکام کے ساتھ ساتھ بخار ہے ۔جس کی وجہ سے لگاتار کمزوری بھی آ رہی ہے لہٰذا ان کی طبیعت کی ناسازی کو دیکھتے ہوئے ان کا کووڈ ٹیسٹ کرایا گیا جس کی رپورٹ پازیٹو آئی ہے ۔انہوں نے بتایاکہ والد محترم کا آکسیجن لیول بھی کم ہورہا تھا،جس کے لئے گھر پر آکسیجن کا بندوبست کیا گیا ہے۔قاری عفان نے بتایا کہ والد محترم تمام احتیاطی تدابیر کررہے ہیں اور رپورٹ آنے کے بعد انہوں نے خود کو ہوم آئی سو لیٹ کر لیا ہے جہاں ڈاکٹر ان کا علاج کر رہے ہیں ۔قاری عفان منصورپوری نے سبھی لوگوں سے اپیل کی ہے کہ وہ ان کے والد محترم مولانا قاری سید عثمان منصورپوری کی صحت یابی کیلئے دعائیں کریں ۔یاد رہے کہ گذشتہ ماہ جمعیۃ علماء ہند کے ناظم عمومی مولانا محمود مدنی بھی کورونا پازیٹو ہو گئے تھے جس کے بعد انہیں گڑگائوں کے میدانتا میڈی سٹی ہاسپٹل میں علاج کی غرض سے داخل کرایا گیا تھا جہاں سے کئی دنو ںکے علاج کے بعد صحت یاب ہوکروہ گھر واپس آئے ہیں ۔