لوک سبھا میں حزب اختلاف کے قائد اور کانگریس رکن پارلیمنٹ راہل گاندھی نے آج پٹنہ میں ’ووٹر ادھیکار یاترا‘ کا اختتام ایک بہت بڑے اعلان کے ساتھ کیا۔ انھوں نے اس یاترا کے اختتام پر منعقد ’ووٹر ادھیکار مارچ‘ سے خطاب کرتے ہوئے کہا کہ ’’مہادیو پورا والے ’ایٹم بم‘ کے بعد اب ’ہائیڈروجن بم‘ آنے والا ہے۔ اس کے بعد نریندر مودی اپنا چہرہ نہیں دکھا پائیں گے۔‘‘ راہل گاندھی کا یہ اعلان کسی بہت بڑے انکشاف کی طرف اشارہ کرتا ہے۔ انھوں نے مہادیوپورا اسمبلی حلقہ میں مبینہ طور پر ایک لاکھ سے زائد فرضی ووٹوں کا انکشاف کر پہلے ہی الیکشن کمیشن کے ساتھ ساتھ بی جے پی کو بھی کٹہرے میں کھڑا کر دیا ہے۔ بہار میں آج اختتام پذیر ’ووٹر ادھیکار یاترا‘ غلط طریقے سے ووٹ کاٹنے اور ووٹ جوڑنے کے خلاف ہی شروع کی گئی تھی، جس نے بہار میں عوام کے اندر ’ووٹ چوری‘ سے متعلق زبردست بیداری پیدا کر دی ہے
راہل گاندھی نے کہا کہ میں بہار کے نوجوانوں کو بتانا چاہتا ہوں کہ ووٹ چوری کا مطلب حقوق کی چوری، ریزرویشن کی چوری، روزگار کی چوری، تعلیم کی چوری، جمہوریت کی چوری، نوجوانوں کے مستقبل کی چوری ہے۔ مہاتما گاندھی کو قتل کرنے والے آئین کو قتل کی کوشش کر رہے ہیں۔ ہم انہیں آئین کا قتل نہیں کرنے دیں گے۔ ہم نے بہار کا دورہ کیا۔ بہار کے سارے نوجوان اٹھ کھڑے ہوئے۔ چھوٹے بچے جیپ کے قریب آتے اور کہتے ووٹ چور، تخت چھوڑ دو۔ درمیان میں بی جے پی والے کالے جھنڈے دکھائیں گے۔ کیا آپ نے ایٹم بم کے بارے میں سنا ہے؟ ہائیڈروجن بم ایٹم بم سے بڑا ہے۔ بی جے پی والوں، تیار ہو جاؤ، ہائیڈروجن بم آنے والا ہے۔ پورا ملک آپ کی حقیقت جان جائے گا۔
