نئی دہلی؍اقوام متحدہ(ایجنسی)
روس اور یوکرین کے درمیان جاری جنگ کو روکنے کے لئے کل دیر رات اقوام متحدہ کی سلامتی کونسل میں ایک قرارداد پر بحث میں ہندوستان نے اتحادیوں پر زور دیا کہ وہ تشدد کو فوری طور پر روک کر سفارتی اقدامات کی طرف لوٹ آئیں۔ اور ممالک کی خودمختاری اور علاقائی سالمیت کا احترام کرنے کی ترغیب دینے کا اعلان کیا۔
ذرائع نے آج یہاں بتایا کہ کل دیر رات اقوام متحدہ کی سلامتی کونسل میں پیش کی گئی یوکرین سے متعلق قرارداد کے حق میں 11 ارکان نے ووٹ دیا اور تین ارکان – ہندوستان، چین اور متحدہ عرب امارات (یو اے ای) نے ووٹنگ میں حصہ نہیں لیا۔ اس قرارداد پر روس نے ویٹو کا حق استعمال کیا اور یوں قرارداد منظور نہ ہو سکی۔
ذرائع کے مطابق ہندوستان نے ووٹنگ کے بعد اپنے فیصلے کے حوالے سے وضاحت جاری کرتے ہوئے متعلقہ فریقوں سے فوری طور پر تشدد بند کرنے، تنازع کے حل کے لیے سفارتی اقدامات پر واپس آنے اور ممالک کی خودمختاری اور علاقائی سالمیت کا احترام کرنے کی اپیل کی۔ وزیر اعظم نریندر مودی نے بھی روسی صدر ولادیمیر پوتن کے ساتھ اپنی ٹیلی فونک گفتگو میں انہی نکات پر زور دیا تھا۔
یوکرین میں بنکروں میں چھپے ہندوستانی طلباء کے مناظر پریشان کن: راہل
نئی دہلی:کانگریس کے سابق صدر راہل گاندھی نے کہا ہے کہ جنگ سے تباہ حال یوکرین میں پھنسے ہندوستانی طلباء کے اپنی جان بچانے کے لیے بنکروں میں چھپنے کے مناظر پریشان کن ہیں۔
مسٹر گاندھی نے حکومت سے اپیل کی کہ وہ ان تمام طلباء کو فوری طور پر واپس لانے کے انتظامات کرے۔ راہل گاندھی نے پہلے بھی حکومت سے اس سمت میں فوری قدم اٹھانے کی اپیل کی تھی۔
مسٹر گاندھی نے ٹویٹ کیا، "بنکروں میں ہندوستانی طلباء کے منظر پریشان کن ہیں۔ مشرقی یوکرین میں بہت سے طلباء شدید حملے میں پھنسے ہوئے ہیں۔ میں پھنسے ہوئے طلباء کے پریشان خاندانوں کے ساتھ کھڑا ہوں۔ میں ایک بار پھر حکومت ہند سے اپیل کرتا ہوں کہ ان طلباء کو فوری طور پر واپس لانے کے انتظامات کرے‘‘۔ اس کے ساتھ کانگریس رہنما نے ایک ویڈیو بھی پوسٹ کی ہے جس میں ہندوستانی طلباء حکومت ہندوستان سے اپیل کر رہے ہیں کہ انہیں وہاں سے فوری طور پر واپس لانے کا انتظام کیا جائے۔
