بھوپال : (ایجنسی)
بی جے پی رکن پارلیمنٹ پرگیہ سنگھ ٹھاکر نے گئوموتر کو ہائی اینٹی بائیوٹک بتایا ہے۔ بھوپال میں ایک پروگرام کے دوران پرگیہ ٹھاکر کا یہ بیان سوشل میڈیا پر بحث کاموضوع بنا ہوا ہے ۔ بی جے پی رکن پارلیمنٹ نے کہاکہ گئو متو کو ہم مقدس مانتے ہیں ، کئی محققین بھی کہتے ہیں کہ گئو موتر ہائی اینٹی بائیو ٹک ہوتا ہے ۔ پرگیہ ٹھاکر کے مطابق محققین کے دعوؤں کی تشریح کرنے پر ہم نے پایا کہ گئوموتر کا استعمال کرنے سے تمام متعدی بیماریاں دور ہوجاتی ہیں۔
پرگیہ ٹھاکر کی یہ ویڈیو سوشل میڈیا پر خوب شیئر کیا جارہا ہے ۔یہ پہلا موقع نہیں ہے جب انہوں نے گئوموتر کے فائدے گنائےہوں۔کورونا دور کی دوسری لہر کے دوران بی جے پی رکن پارلیمنٹ نے بتایا تھاکہ وہ کورونا سے اس لئے بچ گئیں کیونکہ روزانہ گئوموتر کا استعمال کرتی ہیں ۔
پرگیہ ٹھاکر کی ویڈیو پر لوگوں کے رد عمل بھی جم کر آرہے ہیں ۔ لوگوں نے سوال پوچھا کہ اگر یہ اتنا فائدے مند ہے تو اسپتالوں میں ڈاکٹروں کے ذریعہ کیوں اس کے استعمال کے لیے نہیں کہا جاتا ہے۔ فیکٹ چیک نام کے یوزر کے ذریعہ تبصرہ کیا گیا کہ بیشک گئوموتر میں سوڈیم ،پوٹاشیم، کریٹنائن، فاسفورس اور اپیٹیلیل سیل جیسے معدنیات ہوتے ہیں ، لیکن سائنس اس بات کی تائید نہیں کرتی کہ اسے پینا کسی بھی طرح صحت کے لیے فائدہ مند ہو سکتا ہے۔ وہیں گروپرساد امرتی نام کے یوزر کا کہنا ہے کہ آپ صحیح ہو،بغیر کسی حقائق کے عوام کو اس کے پینے کی صلاح نہیں دی جاسکتی ہے ۔ پہلے کوئی مستند تحقیق بتائی جائے۔
واضح رہے کہ 17 مئی 2021 کو ایک پروگرام کے دوران پرگیہ ٹھاکر نے کہا تھا کہ گئوموتر پینے سے پھیپھڑوں کا انفیکشن دور ہو جاتا ہے۔ میں خود بھی گئوموترا کا عرق لیتی ہوں ، اس لیے مجھے نہ تو کورونا کی کوئی دوا لینی پڑی اور نہ ہی مجھے کوروناہوا۔
بتادیں کہ پرگیہ سنگھ ٹھاکر مدھیہ پردیش کے دارالحکومت بھوپال سے بی جے پی رکن ہیں۔ وہ مالیگاؤں دھماکے کیس میں مرکزی ملزم بنائے جانے کے بعد سرخیوں میں آتھیں۔ وہ 2016 سے ضمانت پر ہے۔ وہ اکثر اپنے بیانات کی وجہ سے سرخیوں میں رہتی ہیں۔
