شیخ حسینہ کے گرد گھیرا تنگ ،ایک اور وارنٹ گرفتاری جاری

بنگلہ دیش کی معزول وزیر اعظم شیخ حسینہ کی مشکلات کم ہونے کے آثار نظر نہیں آ رہے ہیں۔ اب رہائشی پلاٹ اسکیم کیس میں، ڈھاکہ میٹروپولیٹن سینئر اسپیشل جج کی عدالت نے شیخ حسینہ، ان کے بیٹے سجیب وازید اور دیگر 16 کے خلاف وارنٹ گرفتاری جاری کیے ہیں۔ اس سے قبل اتوار (13 اپریل 2025) کو شیخ حسینہ، ان کی بہن شیخ ریحانہ اور بھتیجی ٹیولپ صدیقی کے خلاف سیاسی طاقت کا غلط استعمال کرتے ہوئے زمین حاصل کرنے کے الزام میں وارنٹ گرفتاری جاری کیے گئے تھے۔
عدالت نے پوروانچل نیو ٹاؤن میں پلاٹوں کے حصول میں بے ضابطگیوں کے دو معاملات میں اینٹی کرپشن کمیشن (اے سی سی) کی چارج شیٹ کی سماعت کے بعد یہ وارنٹ جاری کیا ہے۔ استغاثہ کے وکیل کے مطابق ملزمان میں زیادہ تر سرکاری اہلکار تھے۔ 
ایک عدالتی اہلکار نے بتایا کہ جج ذاکر حسین نے دارالحکومت ڈھاکہ اور ملک بھر کے مختلف تھانوں کو حکم دیا کہ وہ 29 اپریل کو رپورٹ پیش کریں کہ آیا شیخ حسینہ اور دیگر ملزمان کو گرفتار کیا گیا ہے یا نہیں۔ عدالت نے حکام سے حکم پر عمل درآمد میں پیش رفت کی رپورٹ طلب کی جس پر اے سی سی نے جواب دیا کہ وہ مفرور ہے۔ قبل ازیں 13 اپریل (اتوار) 2025 کو بنگلہ دیش کے ڈھاکہ میٹروپولیٹن سینئر اسپیشل جج ذاکر حسین نے شیخ حسینہ، ان کی بہن شیخ ریحانہ، برطانوی رکن پارلیمنٹ اور بھتیجی ٹیولپ رضوانہ صدیقی اور 50 دیگر کے خلاف پلاٹ اسکینڈل سے متعلق کرپشن کیس میں وارنٹ جاری کیے تھے۔