سنبھل :(ایجنسی)
اتر پردیش کے سنبھل سے سماج وادی پارٹی کے ایم پی ڈاکٹر شفیق الرحمٰن برق کا اعظم خان کے بارے میں بیان سماج وادی پارٹی کے لیڈروں میں ناراضگی کا باعث بن رہا ہے۔ ڈاکٹر شفیق الرحمٰن برق نے حال ہی میں ایک نیوز پورٹل سے گفتگو کرتے ہوئے کہا کہ اعظم خان جیسے ہزاروں لوگ جیل میں ہیں۔ ڈاکٹر برق کا یہ بیان اعظم خان کے حامیوں کو پسند نہیں آیا اور انہوں نے ڈاکٹر برق سے معافی کا مطالبہ کیا ہے۔
اعظم خان کے قریبی ایک ایس پی لیڈر نے بھی ایس پی صدر اکھلیش یادو سے ڈاکٹر شفیق الرحمٰن برق کے خلاف کارروائی کی مانگ کی ہے۔ رام پور سے سماج وادی پارٹی کے رکن پارلیمنٹ اور ایس پی کے قدر آور لیڈر اعظم خان گزشتہ دو سال سے سیتا پور جیل میں بند ہیں اور ایسے میں ڈاکٹر شفیق الرحمن برق کا کہنا ہے کہ اعظم خان جیسے ہزاروں لوگ جیل میں بندہیں۔ اعظم خان کے حامیوںکو پسند نہیں آرہاہے ۔
اتر پردیش کے انتخابی ماحول میں ایس پی لیڈروں کے درمیان رسہ کشی اکھلیش یادو کی پریشانی بڑھا سکتی ہے۔ مرادآباد میں سماج وادی پارٹی کے لیڈر اور اعظم خان کے قریبی ساتھی یوسف ملک نے اپنی رہائش گاہ پر پریس کانفرنس کرتے ہوئے ڈاکٹر شفیق الرحمن برقکے بیان کی مذمت کی اور ان سے فوری معافی مانگنے کا مطالبہ کیا۔ یوسف ملک نے کہا کہ اعظم خان جیسا لیڈر کوئی نہیں بن سکتا۔ انہوں نے خود کو آئین اور قانون کا احترام کرتے ہوئے عدالت میں پیش کیا اور گزشتہ 2 سال سے جیل میں بند ہیں۔ ایسے میں ڈاکٹر برق کا ان کے بارے میں دیا گیا بیان سراسر غلط ہے۔ اعظم خان کروڑوں لوگوں کے دلوں میں بستے ہیں۔ یوسف ملک نے کہا کہ پارٹی ڈاکٹر برق کے خلاف کارروائی کرے، اس سے ہمارے دلوں کو تکلیف پہنچی ہے۔
