ممبئی : (ایجنسی)
لاک ڈاؤن میں لوگوں کے لیے مسیحا بن کر سامنے آئے سونو سود ان دنوں پریشانیوں کے دور سے گزر رہے ہیں۔ انکم ٹیکس محکمہ نے سونو سود پر انکم ٹیکس کی چوری کرنے کا الزام عائد کیا ہے۔ گزشتہ بدھ کو انکم ٹیکس محکمہ نے سونو سود کے 6 ٹھکانوں پر چھاپہ ماری کی۔ ان سب کے درمیان چھاپہ ماری کے بعد پہلی بار سونو سود کا بیان سامنے آیا ہے۔ اب سونو نے پوسٹ شیئر کر کے صاف کر دیا ہے کہ ان کے ساتھ لوگوں کی دعائیں ہیں۔
سونو سود نے ایک لمبا نوٹ شیئر کرتے ہوئے لکھا ہے ’’سخت راہوں میں بھی آسان سفر لگتا ہے، ہر ہندوستانی کی دعاؤں کا اثر لگتا ہے۔‘‘ وہ مزید لکھتے ہیں کہ ’’آپ کو ہمیشہ اپنی بات رکھنے کی ضرورت نہیں ہوتی ہے، وقت خود ایسا کرتا ہے۔ میری خوش نصیبی ہے کہ میں اپنی پوری طاقت اور دل سے ملک کے لوگوں کی خدمت کر سکا ہوں۔ میرے فاؤنڈیشن میں موجود ایک ایک روپے نے زندگی بچانے اور ضرورت مندوں کے لیے کام کیا۔‘‘
بالی ووڈ اداکار نے اپنے نوٹ میں آگے لکھا ہے کہ ’’میں نے کئی مواقع پر اپنے ایڈ دینے والے برانڈس کو میری فیس عطیہ کرنے کو بھی کہا ہے تاکہ کبھی پیسے کی کمی نہ پڑے۔ میں کچھ مہمانوں کی خاطرداری کرنے میں مصروف تھا اس لیے پچھلے 4 دنوں سے آپ کی خدمت کے لیے دستیاب نہیں تھا۔ اب میں ایک بار پھر پورے خلوص کے ساتھ آپ کی خدمت میں زندگی بھر کے لیے واپس آ گیا ہوں۔ کر بھلا، ہو بھلا، اختتام بھلے کا بھلا۔ میرا سفر جاری رہے گا۔ جے ہند۔‘‘
