گورکھپور:(ایجنسی)
آر آر بی- این ٹی پی سی رزلٹ کو لے کر بہار میں جاری ہنگامہ کے درمیان ایک بڑی خبر سامنے آئی ہے۔ مانا جارہا ہے کہ آر آر- بی این ٹی پی سی رزلٹ کی مخالفت میں گورکھپور میں بڑا ریل آندولن کرنے کی تیاری ہے۔ ذرائع سے ملی جانکاری کے مطابق، 28 جنوری کو طلبہ گورکھپور ریلوے اسٹیشن کو ہائی جیک کرنے کی تیاری میں ہیں۔ طلبہ کا دعویٰ ہے کہ کانگریس کے اعلیٰ قائدین اسے بڑا آندولن بنانے کی تیاری میں ہیں۔ پٹنہ میں بدھ کو ہوئی اسٹوڈنٹس اسٹیرنگ کمیٹی کی میٹنگ میں یہ فیصلہ لیا گیا ہے کہ 28 جنوری کو ملک بھر میں آندولن کیا جائے گا۔
ذرائع کی مانیں تو ایسٹرن ریلوے کے ڈی آئی جی کم چیف سیکورٹی کمشنر نے طلباء کی ریل روکو تحریک کے حوالے سے ایسٹرن ریلوے کے جنرل منیجر سمیت تمام اعلیٰ حکام کو خط لکھا ہے۔ یہ خط انٹیلی جنس بورڈ آف ریلویز کے ان پٹ پر جاری کیا گیا ہے جس میں کانگریس کی طلبہ تنظیم سمیت کانگریس پارٹی کی شمولیت کا ذکر ہے۔ 25 جنوری کی رات دیر گئے اس خط کو جاری کرتے ہوئے ریلوے حکام کو ریل روکو تحریک کے بارے میں خبردار کیا گیا تھا۔
بتادیں کہ RRB NTPC رزلٹ کو لے کر بہار میں طلبہ کا احتجاج لگاتار جاری ہے۔ حالانکہ، امتحان کے امیدواروں کے احتجاجی مظاہرے کے بعد ریلوے نے این ٹی پی سی اور گروپ ڈی (کیٹگری۔1) کے امتحانات ملتوی کردیے ہیں۔ ریلوے نے مظاہرین امتحان کے امیدواروں کی شکایتوں کی جانچ کے لئے ایک کمیٹی بنائی ہے اور یہ کمیٹی احتجاجی طلبہ کے اعتراضات کو سنے گی اور ان پر غور کرنے کے بعد اپنی رپورٹ وزارت ریلوے کو سونپے گی۔ اس کے بعد ریلوے منسٹری آگے کا فیصلہ لے گی۔ فی الحال ریلوے کے امتحانات پر ریلوے وزارت نے روک لگادی ہے۔
تاہم ریلوے کے اس فیصلے سے پہلے ہی بہار کی راجدھانی پٹنہ سمیت مختلف اضلاع میں امیدواروں نے ہنگامہ کھڑا کر دیا۔ اتر پردیش سمیت کئی دیگر ریاستوں میں بھی گرمی کی شدت دیکھی جا رہی ہے۔ بہار میں پٹنہ، گیا سمیت کئی اضلاع کے اسٹیشنوں پر ہنگامہ ہوا اور امیدواروں نے زبردست توڑ پھوڑ کی۔ یہی نہیں سڑکیں بلاک کر دی گئیں اور ٹرین کو بھی آگ لگا دی گئی۔ اس کے علاوہ، یہ امیدوار این ٹی پی سی کے نتائج اور گروپ ڈی بھرتی میں CBT-2 لینے کے فیصلے کے خلاف سوشل میڈیا پر احتجاج بھی کر رہے ہیں۔
