نئی دہلی:(ایجنسی)
ملک کی اقلیت برادری کےخلاف مبینہ طور سے تشدد بھڑکانے والے اتراکھنڈکے ہری دوار ’دھرم سنسد‘میں کی گئی تقاریر کی از خود جانچ کی مانگ والی عرضی پر سماعت کے لیے سپریم کورٹ تیار ہو گئی ہے۔ اس معاملے کو آج سینئر وکیل اور کانگریس لیڈر کپل سبل نے سپریم کورٹ میں پیش کیا۔ انہوں نے عدالت سے کہاکہ’ ستیہ مے جیتے‘ کی جگہ اب ’شتر مے جیتے ‘(سچ کی جیت کی جگہ اب جنگ کی جیت)کی باتیں ہورہی ہیں۔ایف آئی آر درج ہوئی لیکن کوئی گرفتاری نہیں ہوئی۔ وہیں چیف جسٹس این وی رمن نے معاملے پر سماعت کی یقین دہائی کرائی ہے۔
دریں اثناء سپریم کورٹ میں جمعہ کے روزایک اور پی آئی ایل داخل کی گئی جس میں عدالت سے کہا گیا کہ وہ مینڈیمس کی رٹ یا کوئی دوسری رٹ، حکم یا ہدایت جاری کرے تاکہ یہ یقینی بنایا جا سکے کہ مسلمانوں کے خلاف نفرت انگیز تقاریر بشمول 17,19دسمبر2021 کو ہری دوار اور دہلی میں ہیٹ اسپیچ کی ایس آئی ٹی یا دیگر ذریعہ سے جو عدالت مناسب سمجھے آزادانہ، معتبر اور غیر جانبدارانہ تحقیقات کی جائے۔
اپیل کے مطابق، 17 اور 19 دسمبر 2021 کے درمیان ہری دوار میں (یتی نرسنگھا نند کی طرف سے) اور دہلی (خود کو ‘ہندو یووا واہنی کہنے والے ایک گروپ کی طرف سے) کی گئی تقریریں نہ صرف نفرت انگیز ہیں، بلکہ ایک کمیونٹی کو کھلے عام موت کی دھمکی دی کی ہے۔
پٹنہ ہائی کورٹ کی سابق جج جسٹس انجانا پرکاش اورمعروف سینئر صحافی قربان علی نے دونوں واقعات کا نوٹس لینے کے لیے آئین ہند کے آرٹیکل 32 کے تحت سپریم کورٹ سے رجوع کیاہے ۔
لوگوں کو توقع تھی کہ مرکزی حکومت کی خاموشی کے بعد سپریم کورٹ ہری دوار دھرم سنسد میں نفرت انگیز تقاریر کا ازخود نوٹس لے گی جس میں مسلمانوں کی تباہی کا مطالبہ کیا گیا تھا۔
تاہم، سپریم کورٹ کے 76 سینئر وکلاء اور دیگر کی جانب سے چیف جسٹس کو لکھے گئے خط کے باوجود کہ وہ اس سنگین معاملے میں مداخلت کی اپیل کرتے ہیں، سپریم کورٹ نے آج تک کوئی کارروائی نہیں کی۔ سپریم کورٹ کے سابق جج جسٹس مدن بی لوکر نے اس پر ردعمل ظاہر کرتے ہوئے ایگزیکٹیو اور عدلیہ کی جانب سے اس موضوع میں مداخلت کرنے کی نااہلی سے ناراضگی کا اظہار کرتے ہوئے واضح طور پر کہا کہ وہ ’بہت پریشان ہیں کہ سپریم کورٹ نے نسل کشی کے مطالبات کے خلاف قدم نہیں اٹھایا۔‘
درخواست گزاروں کے وکیل، وکیل رشمی سنگھ اور سمیتا ہزاریکا نے درخواست میں کہا کہ نفرت انگیز تقاریر جو ہری دوار اور دہلی میں ہندوستانی شہریت کے ایک اہم طبقے کے خلاف اعلان جنگ کرنے کے واضح مقصد کے ساتھ دی گئی ہیں۔
