کیپٹن بولے،اب کانگریس میں نہیں رہوں گا، لیکن بی جے پی میں بھی نہیں جاؤں گا

چنڈی گڑھ (ایجنسی)

پنجاب کانگریس میں پیدا ہونے والا سیاسی تنازع ابھی تک حل نہیں ہوا۔ اب سابق وزیراعلیٰ پنجاب کیپٹن امریندر سنگھ نے پارٹی چھوڑنے کی بات کی ہے۔ انہوں نے این ڈی ٹی وی سے بات چیت میں کہا کہ ‘میں بی جے پی میں نہیں جا رہا ہوں ، لیکن کانگریس میں نہیں رہوں گا ، اب مجھے اپنی ’توہین برداشت نہیں ہوتی‘۔ 18 ستمبر کو کیپٹن کے استعفیٰ کے بعد سے یہ قیاس آرائیاں کی جارہی تھیں کہ وہ کانگریس کو الوداع کہیں گے اور آج انہوں نے اس پر مہر بھی لگا دی ہے۔

کیپٹن امریندر سنگھ نے بدھ کے روز دہلی میں مرکزی وزیر داخلہ امت شاہ سے بھی ملاقات کی تھی ، جس کے بعد کئی قیاس آرائیاں کی جا رہی تھیں ، لیکن اب کیپٹن امریندر سنگھ نے واضح کر دیا ہے کہ وہ بھارتیہ جنتا پارٹی میں شامل نہیں ہوں گے۔ انہوں نے کہا کہ 50 سال بعد میرے اعتماد پر شک کیا جا رہا ہے ، اسے برداشت نہیں کیا جا سکتا۔

این ڈی ٹی وی نے اپنی رپورٹ میں لکھا ہے کہ کانگریس لیڈر امبیکا سونی اور کمل ناتھ نے پارٹی چھوڑنے کے اشارے کے درمیان امریندر سنگھ سے بات کی ہے۔

ذرائع کے مطابق امریندر سنگھ مذاکرات کے بعد بھی ماننے کے لیے تیار نہیں ہیں اور نہ ہی وہ دہلی میں ہونے کے باوجود سونیا گاندھی سے ملنے کے لیے تیار ہیں۔ جبکہ انہوں نے آج صبح قومی سلامتی کے مشیر اجیت ڈوبھال سے ان کے گھر پر ملاقات کی ہے۔