نئی دہلی :(ایجنسی)
مدر ٹریسا کی طرف سے بنائی گئی ایک فلاحی تنظیم مشنریز آف چیریٹی (ایم او سی) نے واضح کیا ہے کہ حکومت نے ان کے بینک اکاؤنٹس منجمد نہیں کئے ہیں۔ 27 دسمبر کوبیان جاری کرکے تنظیم نے کہا کہ انہیں مرکزی حکومت نے اپنے فارن کنٹری بیوشن ریگولیشن ایکٹ (ایف سی آر اے)رجسٹریشن کی تجدید کرنے سے انکار کر دیا ہے۔ تاہم حکومت نے اس کے پیچھے کوئی وجہ نہیں بتائی ہے۔
تنظیم کا یہ بیان مغربی بنگال کی وزیر اعلیٰ ممتا بنرجی کے اس ٹویٹ کے بعد آیا ہے، جس میں انہوں نے بینک کھاتوں کو منجمد کرنے کی خبروں پر مرکز کو نشانہ بنایا تھا۔ حکومت نے چیریٹی کے ایف سی آر اے کی تجدید سے انکار کر دیا۔
تنظیم کو 25 دسمبر کو ان کے ایف سی آر اے رجسٹریشن کی تجدید سے انکار کر دیا گیا تھا۔ یہ تجدید غیر ملکی شراکت کی قبولیت اور استعمال کے لیے درکار ہے۔ ایف سی آر اے کی تجدید نہ ہونے کی وجہ سے تنظیم غیر ملکی فنڈنگ حاصل نہیں کر پائے گی۔
دریں اثنا، وزارت داخلہ نے ایک بیان میں یہ بھی کہا کہ ایم او سی کی ایف سی آر اے رجسٹریشن کی تجدید 31 دسمبر 2021 تک درست تھی اور 25 دسمبر کو اسے مسترد کر دیا گیا۔
ایف سی آر اے کی تجدید کیوں مسترد کی گئی؟
یہ بتاتے ہوئے کہ ایم او سی کے بینک اکاؤنٹس کو منجمد نہیں کیا گیا تھا، وزارت داخلہ نے کہا کہ 25 دسمبر کو مشنریز آف چیریٹی (ایم او سی) کی ایف سی آر اے رجسٹریشن کی تجدید مبینہ طور پر ’ایف سی آر اے 2010 اور فارن کنٹری بیوشن ریگولیشن رولز (ایف سی آر آر) 2011 کو پورا نہیں کرنے کے لیے منع کردیاگیا۔
انہوں نے یہ بھی کہا کہ ایم او سی کی تجدید کی درخواست پر غور کرتے ہوئے ’کچھ منفی ان پٹ دیکھے گئے‘۔ تاہم وزارت داخلہ نے اس بارے میں کوئی وضاحت نہیں کی ہے۔ وزارت داخلہ نے کہا کہ مشنریز آف چیریٹی کا کوئی اکاؤنٹ منجمد نہیں کیا گیا ہے۔ اسٹیٹ بینک آف انڈیانے مطلع کیا ہے کہ مشنریز آف چیریٹی نے خود ایس بی آئی کو ان کے اکاؤنٹس منجمد کرنے کی درخواست بھیجی ہے۔
ممتا بنرجی کے دعوے کے بعد مشنریز آف چیریٹی (ایم او سی) نے کہا کہ ان کے اکاؤنٹس سیل نہیں کیے گئے ہیں۔ مشنریز آف چیریٹی کی ترجمان سنیتا کمار نے کہا کہ حکومت ہند نے ان کا کوئی اکاؤنٹ سیل نہیں کیا ہے اور نہ ہی ان کے پاس اس کے بارے میں کوئی معلومات ہیں۔
ایک چینل سے بات چیت میں سنیتا کمار نے کہا،’نہیں… ہمیں اس بارے میں کچھ نہیں بتایا گیا ہے۔ جہاں تک میرا تعلق ہے، میرے پاس ایسی کوئی معلومات نہیں ہے۔ حکومت ہند نے ہمیں ایسا کچھ نہیں بتایا ہے۔ بینک کا لین دین ٹھیک چل رہا ہے۔ سب ٹھیک ہے۔ ایم او سی نے کہا کہ اس بات کو یقینی بنانے کے لیے کہ کوئی ڈیفالٹ نہ ہو، ہم نے اپنے مراکز سے کہا ہے کہ جب تک معاملہ حل نہیں ہو جاتا، کوئی ایف سی اکاؤنٹ نہ چلائیں۔
