ایم بی بی ایس نصاب میں بھی سنگھ کی انٹری،ہیڈگواروغیرہ کے بارے میں پڑھایا جائے گا

بھوپال : (ایجنسی)

مدھیہ پردیش میں ایم بی بی ایس کے اسٹوڈنٹس کو اب آر ایس ایس اور بی جے پی لیڈروں کے نظریات پڑھائے جائیں گے۔ معلومات کے مطابق یہ اسی سیشن سے لاگو کیا جائے گا۔

دینک بھاسکر کی خبر کے مطابق میڈیکل اسٹوڈنٹس کے فاؤنڈیشن کورس میں آر ایس ایس اور بی جے پی لیڈروں کے خیالات کو اسی سیشن سے بطور لیکچر شامل کیا جا رہاہے ۔ اس میں طلبا کی فکری ترقی کے لیے ملک کے مفکرین کے اصولو ں اور وقار پر مبنی طبی تعلیم کو شامل کیاجائےگا۔

آر ایس ایس کے بانی ڈاکٹر کیشوبلیرام ہیڈگوار ، جن سنگھ کے بانی پنڈت دین دیال اپادھیائے کے علاوہ ، جن مفکرین کو منتخب کیا گیا ہے ان میں آروید ماہر کی شکل میں مشہور مہارشی چارک ، سرجری کے فادر آچاریہ سشرت کے ساتھ سوامی وویکانند اور ڈاکٹر بھیم راؤ امبیڈکر شامل ہیں ۔

مدھیہ پردیش کے میڈیکل ایجوکیشن کے وزیر وشواس سارنگ نے 25 فروری کو اس کے لیے ایک نوٹ شیٹ محکمہ کے افسران کو بھیجی تھی۔ وہیں تجاویز مانگنے کے لیے پانچ رکنی کمیٹی تشکیل دی گئی تھی۔ انہی تجاویز کی بنیاد پر مفکرین کے اصولوں ، فلسفہ حیات کی اہمیت پر لیکچرز کو فاؤنڈیشن کورس میں پڑھانے کے لیے شامل کیا گیا ہے۔ یہ لیکچرز فاؤنڈیشن کورس کے میڈیکل اخلاقیات کا حصہ ہوں گے۔

واضح رہے کہ ایم بی بی ایس کا کورس نیشنل میڈیکل کونسل طے کرتی ہے ۔ کونسل ہر کورس کے موضوعات بتاتی ہے مگر اس موضوع میں کیا لیکچر ہوگا یہ ریاست کا میڈیکل ایجوکیشن ڈپارٹمنٹ طے کر سکتاہے ۔ جو نئے لیکچرز جوڑے گئے ہیں ، وہ ’ میڈیکل ایتھکس‘ موضوع کا حصہ ہیں۔ یہ موضوع فاؤنڈیشن کورس میں پڑھایا جا تا ہے ۔ یہ فاؤنڈیشن کورس ایم بی بی ایس کرنے والے اسٹوڈنٹس کے ایڈمشن کے فوراً بعد انہیں پڑھایا جاتا ہے ۔ اس کے لیے ایک ماہ کا کورس ریاست کے تمام میڈیکل کالجز میں ایڈمشن لینے والے ایم بی بی ایس کے طلبا کو پڑھنا ہوتاہے ۔ مہینہ بھر اس لیکچر کی ایک کلاس ہر دن لگتی ہے ۔ اس کلاس میں شامل ہونا لازمی ہے،حالانکہ اس کا کوئی ایگزام نہیں ہوتا۔